Ерөнхий сайд У.Хүрэлсүх Засгийн газраа бүрдүүлэнгүүтээ өргөтгөсөн хуралдааныг хийсэн. Харин уржигдар /2017.10.25./-нд зөвхөн сайд нар нь оролцсон Засгийн газрын анхны хуралдаан болсон юм. Энэ үеэр сайд нарын хооронд хэрүүл болж, сүйд хийх шахсан байна.

Учир нь Сангийн сайд Ч.Хүрэлбаатар АМГТГ-ыг Сангийн яамны мэдэлд авах тухай санал оруулжээ. Одоогийн хуулиар тус газар Уул уурхай, хүнд үйлдвэрийн яамны мэдэлд байдаг юм. Үүнд Уул уурхай, хүнд үйлдвэрийн сайд Д.Сумъяабазар дургүйцэж тэдний хооронд маргаан болжээ. Улмаар хэрүүл үүсч ширүүхэн юм болсон байна.

Эх сурвалжийн мэдээллээр Уул уурхай хүнд үйлдвэрийн сайд Д.Сумъяабазар Сангийн сайд Ч.Хүрэлбаатар болон ЗГХЭГ-ын дарга Г.Занданшатар нарт эвгүй үг нэлээд хэлсэн аж. Тэрээр “…Та нар энэ яамаа нэртэйгээр нь Геодези, зураг зүйн яам гээд нэрлэчих” гэжээ. Харин улс орны эдийн засгийн гол хүчин зүйл болсон уул уурхай, түүнийг эзэмших, ашиглах тусгай зөвшөөрлийг Сангийн яамны мэдэлд аваачих нь зүйтэй гэж Сангийн сайд, ЗГХЭГ үзэж байгаа бололтой. Энэ нь ч зөв байж магадгүй юм.

Сайд нарын хэрүүл Засгийн газрын хуралдааны дараа ч үргэлжилсэн байна.

Ер нь бол “Эрдэнэс Тавантолгой”, Эрдэнэс Монгол”, “Эрдэнэс Оюутолгой”, бас “Эрдэнэт үйлдвэр” зэрэг төрийн өмчит компаниудыг  ЗГХЭГ мэддэг юм. Улмаар АМГТГ-ыг Сангийн яамны мэдэлд авахаар болж байгаа бололтой.

Эх сурвалж: www.polit.mn