БНСУ-ын Самсунг Электроникс компани өчигдөр шинэ загварын “Galaxy Note 8” утсаа танилцууллаа.

Баттерейнаас нь гал гардаг, дэлбэрдэг гэх мэтчилэн удаа дараа асуудал үүсгэж байсан өмнөх загварын алдагдлаа даван туулж, АНУ-ын “Apple” компани “I phone 8” гар утсаа танилцуулахаас өмнө шинэ загварын бүтээгдэхүүнээ танилцуулжээ.

Нью-Йоркт болсон гар утас танилцуулах үйл ажиллагааны  үеэр Самсунг Электрониксийн ДЖ Ко “Өнгөрсөн жил болсон явдлуудыг бид бүгдээрээ мартаагүй. Гэхдээ маш олон нөүт сонирхогч залуус байгаа гэдгийг ч  мартаагүй.  Чин сэтгэлээсээ та нартаа талархал илэрхийлье” гэсэн байна.

“Galaxy Note 8” утасны ар талд хос камер суурилуулсан бөгөөд ингэснээр зургийн чанар нь илүү сайжирчээ. Мөн дэлгэцний мэдрэгч дээр зураг зурж, үсэг бичих боломжтой “S pen”-ээр тоноглосон байна. Утасны урьдчилсан захиалга эдүгээ эхэлсэн байна. Харин дэлхий даяар есдүгээр сарын 15-наас худалдаанд гарах аж. Үнэ нь одоогоор тодорхойгүй байна.