Сүүлийн үед 37 настай ч, өөрийн болон өрөөлийн нийлсэн 30 гаруй хүүхдийг өсгөж буй гэх М.Сарнай бүсгүйтэй холбоотой асуудал олны анхаарлыг татах болсон. Түүнчлэн, хэд хоногийн өмнө  түүний өсгөж байсан 11 сартай хүү болон 10 настай охиныг төр хамгаалалтдаа  авч, хүүхэд хамгааллын үйлчилгээг үзүүлэх болсон. Үүнтэй холбоотойгоор нийгэмд янз бүрийн төөрөгдөл үүсээд байгаа юм. Тиймээс бид  Сонгинохайрхан дүүргийн Гэр бүл, хүүхэд залуучуудын хөгжлийн хэлтсийн ахлах мэргэжилтэн А.Бадамцэцэгтэй уулзаж зарим зүйлийг тодрууллаа.

-Хүүхдийн төв байгуулахаар “Нэг хүн нэг тоосго” аян эхлүүлж байсан М.Сарнайн өсгөж буй 11 сарнай хүүхдийг танай хэлтсээс авч явсан гэх мэдээлэл гарсан. Энэ талаар тодруулахгүй юу?

-Долоо хоногийн өмнө ажлын хэсэг байгуулагдаад, би иргэн М.Сарнайгийнд очсон юм. Тэгэхэд Тэмүүлэн хүү яах аргагүй л нүдэнд туссан. 11 сартай атлаа биеийн хөгжил нь 5-6 сартай хүүхэд шиг, тэврэхэд зулайнаас нь  хөлс ялгарч байсан. Бас цамцыг нь сөхөж үзэхэд, гэдэс нь хатуу, дүүрэнгэтэй байгаа нь анзаарагдсан юм. Түүнээс хойш 2-3 хоногийн дараа дахиж очсон. Тухайн үед хүүгийн угж, биеийн байдлыг нь анзаарч явлаа. Надад үнэндээ Тэмүүлэнд зориулалтын хүүхдийн тэжээл өгч байгаа юм харагдаагүй. Хүйтэн бүлээн усанд хуурай сүү хагас дутуу найруулсан болоод л угжиж байх шиг байсан.  Бас угж нь маш бохир,  хүүгийн гэдэс урьдын л адил дүүрэнгэтэй байлаа. Уг нь нялх хүүхдэд тодорхой хэмжээний асаргаа сувилгаа хэрэгтэй шүү дээ. Миний анзаарснаар тэнд асаргаа байгаагүй. Хүүхэд, хүүхдийн гар дамжуулж өсгөсөн нэртэй гэртээ байлгаж байгаа юм шиг л харагдсан.

-Тэгээд цагдаад хандсан хэрэг үү?

-Хүүгийн биеийн хөгжлийг харахад нэн яаралтай сувилалд хамруулах шаардлагатай байсан. Төрсөн ээж нь ч гэсэн хүүхдээ авах хүсэлтээ бидэнд ирүүлсэн юм. Тиймээс М.Сарнайд хүүхдийг 108 хүүхдийн утасны хамгаалах байранд аваачиж, сувилалд хамруулъя гэсэн хүсэлт тавьсан боловч, маш их эсэргүүцсэн. Цагдаагийн байгууллагад хандахаас өөр арга байгаагүй. Тэгээд бид хүүхдийг авч, тэр оройдоо хүүхдийн түргэн тусламжийн утас 108 төвд хүргэж өгсөн. Тэнд хүүг эмнэлгийн анхан шатны үзлэг оношлогоонд хамруулсан байгаа.

-Үзлэгээр хүүгийн биеийн байдал ямар байсан бэ?

-Эмчийн үзлэгээр Тэмүүлэн хүү Д витамины дутагдалтай, рахиттай, өсөлт зогссон, бага зэргийн ханиалгатай байсан. 108 төв эмнэлгийн анхан шатны  үйлчилгээг үзүүлж байгаа. Гэр бүл, хүүхэд, залуучуудын хөгжлийн газраас энэ асуудалд анхаарч, тусалж дэмжиж байгааг энэ дашрамд хэлэх хэрэгтэй байх. Тэмүүлэн хүү төрсний гэрчилгээ, бичиг баримтгүй учраас сувилалд хамруулъя гэхэд асуудал үүссэн юм. Харин Гэр бүл, хүүхэд, залуучуудын хөгжлийн газраас туслалцаа үзүүлж, нийслэлийн эрүүл мэндийн газартай холбож өгсөн. Одоо бид хүүг эхтэй нь хамт 7-10 хоног сувилалд хамруулахаар төлөвлөөд байна.

-Хүүгийн ээжийнх нь тухай тодруулаач. Цаашдаа яах вэ?

-Хүүгийн ээж нь Чулуунцэцэг гэдэг 33 настай эмэгтэй байдаг юм билээ. Тэмүүлэнгээс гадна гурван хүүхэдтэй. М.Сарнайгийн хэлсэн шиг өөрөө аваачиж өгөөгүй гэдгээ бидэнд ярьсан. Тухайн үед нөхөртөө хөөгдөж, аргагүйн эрхэнд Улаанчулуутын хогийн цэг дээр өнөө маргаашаа залгуулан амьдарч байсан гэсэн. Барилга дээр ажилладаг, арматурч мэргэжилтэй юм байна. Энэ жил ажил олдоогүй, гэр оронгүй учраас бусад хүүхдүүдээ дүүгийндээ байлгаж, ирж очин байдаг. Бидэнд “Хамгийн түрүүнд ажилтай л болмоор байна. Тэгвэл хүүхдүүдээ хажуудаа авч, хамт амьдармаар байна. Миний том хүүхдүүд дүүгээ хараад өсгөх боломжтой. Ажил олоход л туслаач” гэсэн хүсэлт тавьж байгаа.  Тэр дагуу өнөөдөр би хэд хэдэн байгууллагатай холбогдож үзлээ. Одоогоор ажилд орох хүнтэй чинь уулзая гэж  хариу өгсөн ганц байгуулага байна. Хийх ажил нь орцны жижүүр юм билээ. Хөдөлмөрийн хөлсний доод хэмжээгээр цалинжаад, тэндээ амьдрах боломжтой гэсэн. Чулуунцэцэгийг ажил дээрээ дуудсан. Энэ ажлыг  тогтвор суурьшилтай хийж чадах эсэх талаар нь ярилцаж үзье гэсэн төлөвлөгөөтэй байгаа.

-Тэмүүлэнгээс гадна өөр нэг охиныг  авч явсан гэсэн. Энэ талаар?

- Тийм ээ, Хулан гэдэг  10 настай охин байгаа. Тэр орой Хуланг ч гэсэн хамгаалах байранд аваачсан. Одоогоор охиныг сэтгэл засалын үйлчилгээнд хамруулж байна. Охин илэн далангүй, сэргэлэн цовоо. Гэхдээ түүний яриаг нь сонсоход үеийнх нь хүүхдүүдийн ярьдаг шиг хүсэл мөрөөдөл бага байгаа нь анзаарагдсан. Энэ талаас нь сэтгэл засалын үйлчилгээнд хамруулж,  зөв төлөвшүүлэх чиглэлд анхаарч  ажиллаж байна.

-М.Сарнайн өсгөж буй бусад хүүхдүүдийн асуудлыг хэрхэн шийдэх вэ?

-Бусад хүүхдүүдийн асуудлыг ч гэсэн энэ мэтээр шийдэхээр ажиллаж байна. Одоогоор ар гэрийнх нь нөхцөл байдлыг судлаж байгаа.