Одоогоос гурван жилийн өмнө лалын хэт даврагчид хүчирхэгжин Ирак, Сирийн хойд этгээдийн нутаг дэвсгэрийг эзлэн авч, тэндээ “Халифын вант улс” байгуулснаа албан ёсоор зарлаж байсан билээ. Мөн тухайн үед террористууд Ирак, Ливантын лалын улс гэсэн нэрээ “Лалын улс” болгон өөрчилж байсан юм. Тэгвэл АНУ, ОХУ  тэргүүтэй холбоотон улс орнууд хэт даврагчдын эсрэг тэмцэлд нэгдсэнээр Лалын улс бүлэглэлийн хүч сулран газар нутаг нь улам бүр хумигдаж эхэлсэн байдаг. Харин эдүгээ “Лалын улс” Азид бууриа засч, Филиппинийн Минданао арлын Марави хот руу байгаа чиглүүлсэн юм.

Тус бүс нутагт оршдог лалын “Мауте”, “Абу Саяаф”, “Бангсаморын лалын  эрх чөлөөний дайчид”, “Ансар Халифа” зэрэг зэвсэгт бүлэглэлүүд  “Лалын улс”-ын  далбаан дор нэгдсэнээ зарласан билээ. Эдгээр бүлэглэлүүд өмнө нь католик шашинтай Манилагийн эрх баригчдаас өргөн хэмжээний өөртөө засах эрх шаардаж тэмцэл явуулдаг байсан юм.

Гэсэн ч сүүлийн үед “Лалын улс” бүлэглэлийн арга барилаар тэмцдэг  болжээ. Улмаар Марави хотыг эзлэх ажиллагаа явуулж эхэлсний дараа Сири, Ирак дахь зэвсэгт бүлэглэлийн салбар болсныг “Лалын улс” бүлэглэл өөрсдөө мэдэгдсэн удаатай. Хэрэв тэд Минданао аралд түшиц цэгээ байгуулчихвал Зүүн Өмнөд Азийн Малайз, Индонез, Сингапурын нийт лалын хэт даврагчид цугларах магадлал өндөртэй байгаа юм.

Лалын шашинтнууд хүн амын ихэнхийг эзлэх Ланао Дел Сур мужийн төв Марави хотод гэхэд  Засгийн газар болон лалын шашинтны хооронд үүссэн мөргөлдөөний үеэр 19 иргэн амиа алдсаны гурав нь  эмэгтэй, нэг нь  хүүхэд байжээ. Мөн саяхан тус хотын ойролцоогоос найман ажилчны цогцос олдсон байна. Тэдний толгойн тус газарт нь буудаж, нэгнийх нь биед “урвагч” гэсэн шошго зүүсэн байсан тухай орон нутгийн хэвлэлд мэдээлсэн байв. 

Цагдаагийн газраас мэдэгдсэнээр хохирогчдыг Коран судрын хэсгээс цээжээр уншихыг шаардаж, уг шаардлагыг нь биелүүлээгүйн төлөө буудан хороосон аж. Марави хотод мөргөлдөөн гурав дахь долоо хоногтоо үргэлжилж буй бөгөөд хамгийн сүүлд авсан мэдээллээр нийтдээ 178  хүн амиа алдсан байна.  Гэхдээ бодит байдалд үүнээс ч олон хүн амиа алдсан байх магадлалтай байгаа аж. 

Филиппиний Засгийн газар хуурай замын цэрэг, нисдэг тэрэг, пуужин хүртэл ашиглаж, тус улсын “шийтгэгч” хочит Ерөнхийлөгч Родриго Дутерте олон улсын хэмжээний томоохон уулзалтад ч оролцохгүйгээр анхаарлаа хэт даврагчдын эсрэг чиглүүлж байна. Тэгвэл хамгийн сүүлийн үеийн мэдээллээр Малайз, Индонезийн тал Филиппиний армитай хүч хавсарч, Минданао арал руу цохилтын хүчээ илгээхээр төлөвлөж байгаа аж. Энэ талаар Малайзын Батлан хамгаалахын сайд Хашаммуддин Хуссейн мэдээлсэн байна.

Сингапурт нээгдсэн Азийн аюулгүй байдлын “Шангри-Ла Диалоги” уулзалтын үеэр сайд Хашаммуддин Хуссейн гурван улсын хамтарсан цохилтын хүчний тухай мэдээлэл хийсэн байна. Түүний хэлснээр, хамтарсан цэргийн хүч гурван улсын хиллэдэг далайн бүсэд энэ сарын 19-ний өдрөөс байрлаж, хэт даврагчдын эсрэг тэмцэх ажээ.

Мөн агаарын довтолгоон ч эхлэнэ гэдгийг тэрбээр онцолсон байна. Филиппиний Ерөнхийлөгч Родриго Дутерте тус улсад баазаа байгуулах зорилготой Лалын улсын эсрэг тэмцлээ эхлүүлж, өнөөгийн үүссэн мөргөлдөөн, дотоодын тэмцэлтэй холбоотойгоор Минданао аралд онц байдал зарлаад байгаа.  Нөгөөтэйгүүр, ажиглагчид Лалын улс бүлэглэлийн  Зүүн Өмнөд Азид “Халифын вант улс” байгуулах төлөвлөгөөний нэг хэсэг нь Филиппин бөгөөд Минданао аралд муж байгуулахыг санаархаж байна хэмээн таамаглаж байна.