Ийм сайхан өдөр олон байгаасай. Бороо зөөлөн шивэрсэн энэ өдөр хүн бүр их хотын төв гудамжинд сэтгэл амар, тайван гэгч нь алхаж, энхрий бяцхан үрс нь энд тэндгүй хөөцөлдөн гүйлдэж их хот ёстой л амилсан мэт санагдана. Ойрын хэдэн өдөр хаврын хавсарга шороонд нүдүүлсэн иргэд дээрээс дуслах бороог ч үл ажран үр хүүхдүүдтэйгээ цагийг хөгжилтэй өнгөрүүлэхээр тэмүүлж байлаа.

 

“Хаанаас машин ирээд мөргөчих бол, машины түгжрэлд хэдэн цаг гацах бол, агаарын бохирдол хүүхдэд хортой” хэмээн айж, хоргон гэртээ нуугдан суух хүн ч байсангүй. Бүгд л гэр бүл, найз нөхдөөрөө сэтгэл амар, их хотын төв гудамжаар зугаалж, нэгэн өдрийг үр бүтээлтэй өнгөрүүллээ. Энэ бол автомашингүй өдрийн нэгэн сайхан зураглал. Дэлхийн томоохон хотууд “Автомашингүй өдөр”-ийг жил бүр тэмдэглэн өнгөрүүлдэг уламжлалтай. Манай улс  ч тус өдрийг өргөн дэлгэр тэмдэглэн өнгөрүүлдэг билээ. Жил ирэх тусам цар хүрээ нь нэмэгдэж буй уг өдрийн нээлтийн үйл ажиллагаанд УИХ-ын гишүүн Д.Цогтбаатар, БСШУС-ын дэд сайд Ё.Отгонбаяр, Засгийн газрын хэрэгжүүлэгч агентлаг Биеийн тамир, спортын газрын дарга Ц.Шаравжамц болон бусад албаныхан оролцов.  Мөн энэ үеэр нэгэн онцлох үйл явдал болсон нь “Улаанбаатар марафон” олон улсын тэмцээн байлаа.

 

Тус тэмцээнийг  гүйлтийн  спортыг Монгол Улсад хөгжүүлэх, гүйлтээр хичээллэгч, сонирхогч иргэдийн тоог нэмэгдүүлэх, өсвөр, залуу үеийнхэнд өөрийн дотоод нөөц боломжийг нээж, зорилгодоо хүрэх тэсвэр хатуужил, бие бялдрын болон оюун санааны өв тэгш хүмүүжлийг төлөвшүүлэх, иргэдийг өдөр тутмын биеийн тамираар хичээллэх идэвх санаачлагыг дэмжих зорилгоор дөрөв дэх жилдээ амжилттай зохион байгуулав. Энэ удаагийн гүйлтийн тэмцээнд ОХУ, БНХАУ, Япон, БНСУ, Кени зэрэг улсын тамирчдаас гадна Монгол Улсад ажиллаж амьдарч байгаа ОХУ, БНХАУ, Япон, БНСУ, Кени, Их Британи, АНУ, БНГУ, Казакстан, Чех, Австрали, Унгар, Канад, Филиппин, Шинэ Зеланд, Франц, Монгол зэрэг 17 орны ЭСЯ-ны гадаадын ажилтан, тэдгээрийн гэр бүлийнхэн оролцжээ.  

 

Энэ удаагийн тэмцээний 21 км-ийн зайд МУГТ, Олон улсын хэмжээний мастер Б.Сэр-Од, 42 мянган метрийн зайд Кени улсын тамирчин Силлас К.Санг тэргүүлсэн. Харин  хоёрдугаар байрт “Хилчин” спорт хорооны тамирчин Н.Мөнхбаяр, гуравдугаар байрт  “Алдар” спорт хорооны тамирчин Ц.Бямбажав нар орсон юм. Мөн эмэгтэйчүүдийн 42 км-ийн зайд Хөнгөн атлетикийн олон улсын хэмжээний мастер, үндэсний шигшээ багийн тамирчин Б.Мөнхзаяа, хоёрдугаар байрт ОУХМ Ч.Шинэцэцэг, гуравдугаар байрт ОУХМ Ц.Санжидмаа нар тэргүүлжээ. 

 

Дашрамд сонирхуулахад, “Улаанбаатар марафон” олон улсын гүйлтэд оролцогчдын тоо жилээс жилд өсөн нэмэгдэж байгаа гэнэ. Тодруулбал, 2014 онд 16839, 2015 онд 18085,  2016 онд гадна, дотно сонирхогч, дэлхийд танигдсан нэртэй тамирчид тэргүүтэй 27 мянга гаруй хүн оролцсон бол энэ жил 33 мянган хүн гүйж, дээд амжилт тогтоолоо. Мөн “Автомашингүй өдөр”-т оролцсон иргэд гэр бүл найз нөхдөөрөө нэг өдөр ч болтугай автомашин, гар утас, телевизээс холдож, сэтгэл амар их хотын гудамжаар зугаалах өдөр олон байгаасай гэх саналыг дэвшүүлж байв. Мөн энэхүү өдрийг жилд ганц удаа гэлтгүй улиралд нэг удаа зохион байгуулах хэрэгтэй гэх нэгэн ч байсан юм.

 

Их хотод түгжрэлээс эхлээд бухимдах зүйл олон. Үүнээс болж гэр бүлээрээ цагийг хөгжилтэй өнгөрүүлэх төлөвлөгөө нь хүмүүсийн уур бухимдалд уусан бүтэлгүйтдэг ч байж мэдэх юм. Тиймээс түгжрэлгүй, айх аюулгүй, эрүүл, тав тухтай орчинг нийслэлчүүдэд бэлэглэсэн ийм сайхан өдөр олон байгаасай.