Намын дарга нь Ерөнхийлөгчийн сонгуулийн шалгуурт бүдэрснээр МАХН-ын улстөрчдийн дунд Ерөнхийлөгчид өрсөлдөх марафон эхэлсэн бололтой. Мөн тус намынх биш атлаа дэргэд нь давхиж яваад өрсөлдөх хүсэлтэй улстөрчид ч чамгүй олон байгаа бололтой. Тэдний нэг нь УИХ-ын гишүүн асан С.Ганбаатар.

Уул нь улс төрд анх танигдахдаа бие даагч гэх тун гоё автортай гарч ирж байлаа. Төд удалгүй Хөдөлмөрийн үндэсний нам байгуулж, даргаар нь очсон ч тамганы маргаанаас болж хөөгдөх шахам гарсан нь худлаа биш. 2016 оны сонгуулиар өвдөг шороодож хэсэгтээ л нам гүм байсан Ерөнхийлөгчийн сонгуулийн дуулианаар хэл орж эхэлсэн.

Улмаар МАХН-ын даргын дэргэд ойр шадарлах болж, өнөөдөр гэхэд л МАХН-ын өмнөөс хэвлэлийн хурал хийгээд сууж байна. Авлигын эсрэг тууштай тэмцдэг хэмээн өөрийгөө магтдаг С.Ганбаатар гэх улстөрч авлигын загалмайлсан эцэг гэгддэг Н.Энхбаярыг өмгөөлөөд сууж байгааг харах цаг ирдэг л юм байна. Улс төрд нөхөрлөл гэж үгүй.

Мөнхийн эрх ашиг гэж бий гэдгийг л энэ хоёр эрхэм яруу тодоор харуулав. Түүнчлэн, МАХН-аас Ерөнхийлөгчид нэр дэвших хүсэлтээ гэдгээ Академич, Хууль зүйн шинжлэх ухааны доктор, профессор, Шинжлэх ухааны гавьяат зүтгэлтэн С.Нарангэрэл илэрхийлжээ. Мөн УИХ-ын Тамгын газрын дарга асан Ц.Шаравдоржид ч ийм хүсэл байгаа гэдгээ нуугаагүй. Тэгэхээр Н.Энхбаяр уу, эсвэл өөр хүн үү гэдэг нь ирэх лхагва гарагаас өмнө тодорхой болох нь. МАХН-ын хийх нүүдэл ямар байхаас АН-ын нэр дэвшигч үү, эсвэл МАН-ын нэр дэвшигч ялах уу гэдэг тодорхой болно. Мэдээж хоёр том улс төрийн хүчний дунд л өрсөлдөөн явна. МАХН-ын нэр дэвшигчид Ерөнхийлөгчид өрсөлдсөн гэдэг намтар л чухал байх биз ээ.

Хэрвээ Н.Энхбаяр өөрөө нэр дэвшвэл АН-ын нэр дэвшигчид том боломж гарч ирэх байв. Харин өөр нэр дэвшигч өрсөлдвөл хэн хэнийх нь саналаас адилхан хувааж МАН-ын өрсөлдөгч илүүрхэх магадлалтайг улс төр судлаачид онцолж байгаа юм.  Н.Энхбаяр өөрөө л нэр дэвшихгүй бол МАН ялалт байгуулна.

Энэ тохиолдолд  ашиггүй гэдгийг мэдэж байгаа нь тодорхой.  Үнэн худлыг хэлэхэд эрт байна. Н.Энхбаяр ямар шийдвэр гаргахаас хоёр өрсөлдөгчийн санал хаашаа хуваагдах вэ гэдэг нь тодорхой болно. Мэдээж эр хүний дотор эмээлтэй хазаартай морь бий гэгчээр өстөн дайсан болох МАН-ынханд боломж олгохгүй гэдгээ Н.Энхбаяр мэдэхийн дээдээр мэдэж байгаа нь дамжиггүй.