Ням гараг бүр монголчуудын халуун ам бүлээрээ үздэг болсон “Яг түүн шиг” шоуны энэ удаагийн дугаарын ялагчаар 60-аад оныхон амьд шүү гэдгийг мэдрүүлэхээр шоунд оролцож буй аялагч, дуучин Г.Ганхүү тодорлоо.

Тэрбээр, энэхүү шоуны шүүгчээр ажиллаж байсан ч өөрийгөө сорьж, басхүү залуус дунд манай үеийнхэн байгаа шүү гэдгийг мэдрүүлэхээр оролцох болсноо мэдэгдсэн. Дугаар бүрт өөрт оногдсон дүрдээ гайхалтай хувирч чаддаг түүний мэдлэг үнэхээр далай шиг. Шүүгчээр ажиллаж байхдаа тухайн оногдсон дүрийнх нь талаар мэдээлэл хангалттай өгч чаддаг байсан бол энэ удаад оролцохдоо ч тухайн дуучныхаа зан авир, төрх, үйл хөдлөл, цаашлаад англи хэлийг ямархуу чадварлаг эзэмшсэн бэ гэдгээ харуулж буй юм.

Мөн өөрийн үнэт гурван оноогоо ч хэн нэг найздаа, эсвэл хамтрагчдаа бус үнэхээр тухайн өдрийн шоуны ялагч байж чадсан нэгэнд харамгүй өгч чаддаг учраас ард түмэн түүнд хайртай болсон билээ. Г.Ганхүүд ялагчийн гурван сая төгрөгийн авч ирсэн дуучин бол дэлхий дахинд “Рок эмээ” хэмээх нэрээр алдаршсан Tina Turner юм. Тэрбээр шүүгчид, оролцогчдоос хамгийн олон оноог авч хол тасархай түрүүлсэн юм. Уншигч та рок эмээ болон Г.Ганхүү хоёрын бичлэгийг харьцуулж үзээрэй. Үнэхээр л яг түүн шиг байж чадсан биш гэж үү.