Францын Ерөнхийлөгчийн сонгуулийн хоёрдугаар шатанд Эдийн засгийн сайд асан Эммануэль Макрон, “Үндэсний фронт” намын Марин Ле Пен нар тунаж үлдлээ. Сонгуулийн шийдвэрлэх шатны санал хураалт ирэх сарын 7-нд болох юм.

Өчигдөр франц даяар нэгдүгээр шатны сонгуулийн санал хураалт өглөө 08.00 цагт эхэлж, оройн 20.00 цагт дуусгавар болж, санал тооллогын ажиллагаа албан ёсоор эхэлсэн байдаг. Тэгвэл саналын хуудасны 77 хувийг тоолсны дараах байдлаар Макрон 6.93 сая санал авсан бол Ле Пен 6.86 сая санал авчээ.

Барууны төвч үзэлт Бүгд Найрамдах намаас нэр дэвшсэн, Ерөнхий сайд асан Франсуа Фийон 5.9 сая санал авсан бол Зүүний намын дарга асан Жан-Люком Меленхоном 5.65 сая санал авсан аж.

Зүүний хүчний “Үндэсний фронт” намаас нэр дэвшигч Марин Ле Пены хувьд хэрэв Ерөнхийлөгч болбол Францыг ЕХ-оос гаргаж, цагаачлалын хатуу бодлого баримтлана гэдгээ тодорхой илэрхийлсэн. Манай улсын 4500 орчим иргэн тус улсад сурч, хөдөлмөрлөдөг бөгөөд  Марин Ле Пен ялалт байгуулсан тохиолдолд дээрх тоонд өөрчлөлт орж болзошгүй билээ.

Учир нь түүний баримталж буй хоёр гол бодлогын нэг нь цагаачдыг хүлээн авахгүй байх, албадан гаргах бол нөгөө нь ЕХ-ноос Францыг гаргах юм. Үүнээс гадна түүний нэр хүнд АНУ-ын Ерөнхийлөгчийн сонгуульд Д.Трамп ялалт байгуулсны дараа огцом өсч эхэлсэн байдаг.  

Харин Э.Макрон ЕХ-ны дүрмийг дагахаа мэдэгдээд буй. Гэхдээ зарим олон улс судлаачид Марин Ле Пен шийдвэрлэх шатанд тунаж үлдэх магадлалтай ч, Ерөнхийлөгч болохгүй болов уу гэсэн таамгийг дэвшүүлж байгаа юм. Тэдний үзэж буйгаар францчууд ЕХ-нд үлдэх, байр суурийг нь бэхжүүлэх сонголтыг хийх магадлалтай ажээ.