450 орчим айл үерт хамгийн их өртдөг гэв
Дулааны улиралд Орхон аймгийн Баян-Өндөр сумын Шанд, Яргуйт, Ихзалуу, Уртынгол, Говил багийн нутаг дэвсгэрт шар усны болон хур борооны их ихээр тогтож гудамж, зам талбай усанд автах асуудал жил бүр гардаг. Дээрх багуудад нийтдээ 6700 гаруй өрх оршин суудгаас 450 орчим нь үер усанд өртдөг гэж Эрдэнэт хотын Захирагчийн албаны дарга М.Түмэнжаргал ярилаа.
Тиймээс уг асуудлыг шийдэх зорилгоор тус албанаас Онцгой байдлын газартай хамтарч 7 км үерийн далан шинээр байгуулахаас гадна 4.2 км даланг сэргээх ажлыг эхлүүлээд байна. Одоогоор 4.2 км үерийн далан, сувгийг шинээр гаргаж 1.6 км даланг сэргээгээд байгааг Захирагчийн албанаас мэдээллээ.
Мөн дээрх байршлуудад үерт автаж шавар шалбааг үүссэний улмаас гудамжуудад явган хүн болон авто машин зорчиход хүндрэл гардаг. Тиймээс дээрх багуудын 74 гудамж, байршилд 11.4 км шороон замыг сэргээх ажил хийгдэж байгаа юм байна. Энэ оны аймаг, Баян-Өндөр сумын төсөвт шинээр шороон зам байгуулах ажлын хөрөнгө суусан. Одоогоор гүйцэтгэгчийг сонгон шалгаруулах тендер зарлагдсан байгаа аж.
Дашрамд дурьдахад, Эрдэнэт хотын Захирагчийн албанаас Цагдаагийн газрын Замын цагдаагийн тасаг тэргүүтэй байгууллагуудтай хамтарч авто замын нөхөөс, тэмдэг тэмдэглэгээний үзлэгийг хийж дууссан байна. Үзлэгийн дүнд хотын хэмжээнд 22 байршилд автомашины зогсоол өргөтгөх болон шинээр байгуулах хэрэгтэй гэж үзжээ.
МЭДЭЭНИЙ СЭТГЭГДЭЛ
ХОЛБООТОЙ МЭДЭЭ
Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.
Copyright © MMINFO.MN All Rights Reserved. Powered by HUREEMEDIA.
