Ерөнхийлөгч Элчин сайд Чинар Рустамоваг хүлээн авч уулзлаа

Ерөнхийлөгч Элчин сайд Чинар Рустамоваг хүлээн авч уулзлаа

Монгол Улсын Ерөнхийлөгч Х.Баттулга Туркменистан Улсаас Монгол Улсад суугаа Онц бөгөөд Бүрэн эрхт Элчин сайд Чинар Таджиевна Рустамоваг өнөөдөр хүлээн авч уулзлаа.

Уулзалтын эхэнд Элчин сайд Ч.Рустамова Туркменистан Улсын Ерөнхийлөгч Гурбангулы Бердымухаммедовоос Монгол Улсын Төрийн тэргүүнээр сонгогдсонд нь баяр хүргэн Монгол Улсын Ерөнхийлөгч Х.Баттулгад ирүүлсэн талархлын захидлыг гардууллаа. Мөн ирэх есдүгээр сард Туркменистан Улсын нийслэл Ашхабад хотноо болох Азийн тоглолтын урилгыг гардуулсан юм.

Монгол Улсын Ерөнхийлөгч Х.Баттулга хариу талархал илэрхийлээд, төлөвлөсөн ажил их байгаа тул Азийн тоглолтод оролцож амжихгүй гээд Монгол Улсаас оролцох баг тамирчдаа дэмжинэ гэдгээ илэрхийллээ. Тус наадамд нийт 64 орны баг тамирчид оролцох бөгөөд Монгол Улсаас 183 тамирчин оролцохоор болсон нь БНХАУ-аас оролцох тамирчидтай эн тэнцэх тоо юм гэдгийг Элчин сайд Ч.Рустамова онцолж байлаа.

Монгол Улсын Ерөнхийлөгч Х.Баттулга энэ 2017 онд хоёр орны хооронд дипломат харилцаа тогтоосны 25 жилийн ой тохиож буйг тэмдэглээд, ирэх 4 жилд Монгол Улс, Туркменистан Улсын уламжлалт харилцааг өргөжүүлэн хөгжүүлэхэд хамтран ажиллана гэдгээ илэрхийлэв. Туркменистан Улс байгалийн баялгаа зохистой ашигладаг туршлагыг Монголын тал анхаарч үзэх, тус улс сүүлийн жилүүдэд эрчимтэй хөгжиж, 134 тэрбум ам.долларын хөрөнгө оруулалт хийх том төслүүд зарлаж байгаа нь мөн анхаарч судлахуйц ажил мөн гэдгийг тэмдэглэв.

Туркменистан нь байгалийн хийн нөөцөөрөө дэлхийд дөрөвдүгээрт ордог орон юм. Туркменистан Улсын талаас Монгол Улсад БНХАУ-ын нутгаар дамжуулан байгалийн хий нийлүүлэх боломжтой, мөн Монгол Улсаас мах авах боломжтой зэрэг ажил хэрэгч саналуудыг илэрхийлж байв. Монголын ноолууран бүтээгдэхүүн ч гадаад зах зээлд эрэлттэй байгааг Элчин сайд Ч.Рустамова онцолсон юм.

Монгол Улсын Ерөнхийлөгч Х.Баттулга бизнесийн салбараас төрсөн хүн Монгол Улсын Төрийн тэргүүн болсны хувьд Туркменистаны талаас ажил хэрэгч саналууд тавьж буйд талархал илэрхийлэв.

Уулзалтын төгсгөлд  Элчин сайд Ч.Рустамова Туркменистан Улсын Ерөнхийлөгч Гурбангулы Бердымухаммедов Монгол Улсын Ерөнхийлөгч Х.Баттулгыг тааламжтай цагтаа Туркменистан Улсад айлчлуулахаар урьсан болохыг уламжлав.  Монгол Улсын Ерөнхийлөгч Х.Баттулга урилгыг талархан хүлээж авлаа.

ХОЛБООТОЙ МЭДЭЭ
МЭДЭЭНИЙ СЭТГЭГДЭЛ

АНХААРУУЛГА:Уншигчдын бичсэн сэтгэгдэлд mminfo.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99998796 утсаар хүлээн авна.