Монгол Улсын Засгийн газрын ээлжит хуралдаан өчигдөр болж, нэлээд олон асуудлыг хэлэлцэж шийдвэрлэлээ. Хамгийн түрүүнд Улс тунхагласны баярын өдрийн амралтыг арваннэгдүгээр сарын 25 буюу энэ баасан гарагт шилжүүлж, бүх нийтээр амрах эсэх асуудлыг хэлэлцэн шийдвэрлэлээ. УИХ-аас жил бүрийн арваннэгдүгээр сарын 26-ны өдрийг Бүгд Найрамдах Улс тунхагласан өдөр хэмээн нийтээр тэмдэглэх баярын өдөр болгон хуульд өөрчлөлт оруулсан юм. Гэтэл энэ жил арваннэгдүгээр сарын 26 нь бямба гарагт таарч байгаа тул баярын амралтыг ийнхүү шилжүүлэхээр болсон бөгөөд Засгийн газрын хуралдаанаар дээрх асуудлыг дэмжиж, энэ баасан гарагт бүх нийтээрээ амрахаар боллоо. 

 

Сумдын эмнэлэгт яаралтай машин олгохоор болов

 

Өвөлжилт хүндэрч, зуд болж болзошгүй талаар сүүлийн хэдэн өдрийн турш ярьж байгаа билээ. Тэгвэл байгаль, цаг уурын энэхүү хүнд үед орон нутгийн иргэдэд эрүүл мэндийн тусламж үзүүлэх ёстой сумын эмнэлгүүдийн яарал­тай тусламжийн машины ашиг­лалт болон гүйлт, нормын хугацаа дуусч, эвдэрсэн байгаа аж. Тиймээс энэхүү асуудлыг шийдэх хүрээнд сумдын эмнэлэгт туулах чадвар сайтай, УАЗ маркийн 22 автомашиныг яаралтай олгож, хөрөнгийг 2017 оны төсвийн багц, Засгийн газрын нөөц сангаас гаргахаар боллоо.

 

Монгол, Оросын Засгийн газар хоорондын комисс хуралдана 

 

Монгол, Оросын Засгийн газар хоорондын комиссын ээлжит хуралдааныг ирэх сарын 11-13-ны хооронд Улаанбаатар хотод хийхээр хоёр тал тохирчээ. Хоёр улсын Засгийн газар хоорондын Комиссын хуралдаанаар худалдаа, эдийн засаг, дэд бүтэц, тээвэр, уул уурхай, эрчим хүч, хүмүүнлэгийн салбарын хамтын ажиллагаа зэрэг олон чухал асуудлыг хэлэлцэх юм байна. Уг хуралдаанд оролцох Монголын талын төлөөлөгчдийн баримтлах удирдамжийг өчигдрийн Засгийн газрын хуралдаанаар зөвшөөрлөө. Монгол талын төлөөлөгчдийг Монгол Улсын Шадар сайд бөгөөд тус комиссын Монголын хэсгийн дарга У.Хүрэлсүх ахлахаар болжээ. 

 

Гемодиализын эмчилгээний зардлыг төр хариуцна 

 

Бөөрний хурц болон архаг дутагдалтай иргэдийн бөөр орлуулах-гемодиализ эмчилгээний тасралтгүй байдлыг хангах, хүртээмжийг нэмэг­дүү­лэх зорилгоор энэ чиг­лэлийн эмнэлгийн тус­ламж, үйлчилгээ эрхлэх тус­гай зөвшөөрөл бүхий хувийн хэвшлийн эрүүл мэн­дийн байгууллагуудаар гемо­диа­лизийн эмчилгээг гүйцэтгүүлэх Засгийн газрын тогтоол батал­лаа. Уг эмчилгээний төлбөрийг төрөөс хариуцах бөгөөд зардлыг жил бүр улсын төсөвт тусгаж байхыг холбогдох сайд нарт даалгалаа.

 

Өнөөдрийн байдлаар улсын хэмжээнд төр, хувийн хэвшлийн 27 байгууллагад бөөр орлуулах 169 ширхэг гемодиализын аппарат ажиллаж байгаа юм. Улсын хэмжээнд 564 хүн энэ төрлийн эмчилгээнд орох шаардлагатай бөгөөд өдөрт 2-3 хүн шинээр оношлогдож байгааг мэргэжлийн байгуул­лага тооцож гаргажээ. Эм­чил­гээ­ний заалтаар бол нэг хүн долоо хоногт гурван удаа, насан туршдаа гемодиализын эм­чил­гээ хийлгэх бүртээ ху­вийн эмнэлэгт 100-120 мянган төгрөгийн төлбөр төлөх  шаард­лагатай болдог аж. Мөн жилд дунджаар 20 орчим сая төгрөг зарцуулдаг байна. Энэ зардлыг төрөөс хариуцахаар боллоо. 

 

300 ортой төрөх эмнэлгийг концессоор барьж дуусгана

 

“Хан-Уул дүүрэгт баригдаж байгаа 300 ортой төрөх эмнэлгийн барилгын ажлыг дуусган, дэд бүтэц барих төсөл”-ийн концесс олгох уралдаант шалгаруулалтын явцын талаар Монгол Улсын сайд, Засгийн газрын Хэрэг эрхлэх газрын дарга Ж.Мөнхбат Загийн газрын хуралдаанд танилцууллаа. Төслийг “Зураг төсөл боловсруулах-барих-шилжүүлэх” төрлөөр уралдаант шалгаруулалтын аргаар хэрэгжүүлэхээр Засгийн газар 2013 онд шийдвэрлэсэн. Барилгын ажлын гүйцэтгэл 68 хувьтай байсан ч төсвөөс санхүүжүүлэх боломжгүй болсноос ажил нь зогсоод байгаа юм.

 

Төслийн уралдаант шалгаруулалтыг энэ оны тавдугаар сард зарласан бөгөөд нэг компани саналаа ирүүлээд байна. Иймээс цаашид уралдаант шалгаруулалтыг үргэлжлүүлэхийг Үндэсний хөгжлийн газарт даалгалаа. Энэхүү төсөл хэрэгжвэл ЭМД-ын сангаар эх, хүүхдэд эмнэлгийн тусламж, үйлчилгээ үзүүлэх, олон улсын стандартын шаардлага хангасан, 140 ортой амаржих газар, хүүхдийн 160 ортой төрөлжсөн нарийн мэргэжлийн төв бүхий эх, хүүхдийн цогц эмнэлэгтэй болох юм.

 

2017 онд тусгай зориулалтаар 68 угалз агнана

 

2017 онд тусгай зориулалтаар 68 угалз, 75 тэх, 32 халиу буга болон бор гөрөөс 10, зэрлэг гахай 10, цагаан зээр 100, агнуурын шувуу 400 толгойг хүртэл агнуулахаар, тул загас 500 толгойг барьж буцаан тавиулахаар Засгийн газраас тогтоолоо. Мэргэжлийн байгууллагуудын дүгнэлтээс үзвэл дээрх тооны ан амьтан агнуулахад тоо толгойн өсөлтөд сөргөөр нөлөөлөхгүй юм. Мөн хуралдаанаар агнуурын амьтны нэг тоо толгойд ногдуулах жишиг үнэ, төлбөр, хураамжийг 2001, 2005 оны инфляцийн төвшин, мэргэжлийн байгууллага, Шинжлэх ухааны академи, Сорилын биологийн хүрээлэнгийн санал зэргийг харгалзан 30 хүртэл хувиар нэмлээ.

 

Ингэснээр ирэх онд улсын төсөвт гурван тэрбум гаруй төгрөгийн орлого орно гэж тооцоолж байна. 2016 онд  60 угалз, 70 тэх, 30 халиу буга, 20 саарал чоно, тус бүр 10 зэрлэг гахай, бор гөрөөс, 150 цагаан зээр, 400 хүртэл агнуурын шувууг агнуулах, 400 тул загас барьж буцаан тавиулахаар 2015 онд шийдвэрлэж байжээ. Амьтны нөөц ашигласны төлбөрт 13 аймгийн 37 сумын төсөвт 940 гаруй сая төгрөг ороод байгаа аж. 

 

БХИС-ийг Үндэсний батлан хамгаалахын их сургууль болголоо

 

Аюулгүй байдал, цэрэг, батлан хамгаалах чиглэлээр сургалт, судалгаа эрхлэх чадавхийг нэмэгдүүлэх зорилгоор Батлан хамгаалахын их сургуулийг Үндэсний батлан хамгаалахын их сургууль болголоо. Ингэснээр батлан хамгаалахын бодлого, эрдэм шинжилгээ, судалгаа, инновацийн “Сургууль төвт” тогтолцоо бий болох үндэс бүрдэж, дэлхийн олон орны ижил төрлийн сургалтын байгууллагатай адил төвшинд очих, ижил стандартаар   сургалт явуулах бололцоотой болох юм. Мөн багшлах боловсон хүч чадваржиж мэргэшин, зохион байгуулалт, нөөцийн бодит дэмжлэг бий болно.

 

Манай улсын батлан хамгаалах салбартай хамтын ажиллагаатай АНУ, БНХАУ, Турк, БНСУ зэрэг олон орны Үндэсний батлан хамгаалахын сургууль, бүс нутгийн болон олон улсын байгууллага, холбоотой харилцахад “Үндэсний” гэх тодотгол нь статусыг нь өргөж, илүү өргөн хүрээнд, харилцан итгэлцэлд тулгуурлан адил төвшинд хамтран ажиллах нөхцөл, боломж бүрдэнэ гэж Батлан хамгаалах яам үзжээ.

 

Засгийн газрын тогтоол баталлаа

 

Засгийн газрын ээлжит хуралдаанаар хөрс, бэлчээрийг хамгаалах, нөхөн сэргээхтэй холбоотой асуудлаар “Засгийн газарт чиглэл өгөх тухай” Монгол Улсын Ерөнхийлөгчийн зарлигийн төслийг хэлэлцэн зарчмын хувьд дэмжиж хэд хэдэн саналыг уламжлахаар болсон. Мөн Төрийн өмчийн бодлого, зохицуулалтын газраас 2017 онд улсын төсвийн хөрөнгө оруулалтаар хэрэгжүүлэх төсөл, арга хэмжээний жагсаалт, Хөгжлийн банкны эх үүсвэрээр хэрэгжүүлэх төсөл арга хэмжээний жагсаалтыг тус  тус  баталлаа. Түүнчлэн Монголын оюутны спортын IV их наадмыг 2017 онд орон даяар зохион байгуулах Засгийн газрын тогтоол баталлаа. Үүнээс гадна өргөдөл гомдлын шийдвэрлэлтийн талаар мэдээллээ.

 

Үүнд энэ оны гуравдугаар улиралд Засгийн газрын гишүүд, яам, агентлагийн удирдлагад хандан иргэдээс 40 орчим мянган өргөдөл, гомдол, санал хүсэлт ирсний 37 мянга гаруйг нь хуулийн хугацаанд шийдвэрлэсэн байна. Энэ нь 95 орчим хувьтай гэсэн үг юм. Засгийн газарт хандсан иргэдийн дийлэнх нь нийгмийн халамжид хамрагдах, мөнгөн тусламж, тэтгэвэр, тэтгэмж, хөдөлмөр эрх­лэлт, газар эзэмших, ашиглах­тай холбоотой асуудлаар ханджээ.