Аваад ирсэн 49 хувь, алдах гэж байгаа 51 хувийн аль нь чухал вэ?
С.Баярыг Ерөнхий сайд байх үед “Эрдэнэт” үйлдвэрийн Монголын төрийн эзэмшдэг 51 хувийг нэгэн бизнесмэний гадны банкнаас авсан зээлийн барьцаанд тавьсан байдаг. Тодруулбал “Жаст” группын ерөнхийлөгч Ш.Батхүүгийн Өмнөд Африкийн “Стандарт” банкнаас авсан 109 сая ам.долларын зээлийн батлан даалтыг гаргаж, нэг ёсондоо Засгийн газар “Эрдэнэт” үйлдвэрийн өөрийн эзэмшдэг хувиа дэнчин болгож өгсөн байв.
Тухайн үеийн захирал Ч.Ганзориг болон Төрийн өмчийн хорооны дарга Д.Сугар нарын гарын үсгээр баталгаажсан уг батлан даалтын асуудал олон улсын арбитрын шүүхээр таван удаа ороод байна. Өнөөдрийн байдлаар үлдэгдэл 51 сая ам.долларыг “Эрдэнэт” үйлдвэр, Монгол Улсын төрөөс төлөх шаардлагатай гэсэн шийдвэр гаргаад байгаа юм.
Гэтэл манай улстөрчид Оросын талаас худалдан авсан 49 хувийг шалгаж, хардаж, нийгэмчлэх тухай ярьсаар байна. Лондонгийн арбитрын шүүхээс гаргасан шийдвэрийг биелүүлж төрөөс 51 сая ам.доллар төлөх эсэх асуудлыг анхаарч хөндөх нэг ч хүн алга. Нэгэнт олон улсын шүүхийн шийдвэр эцэслэн гарсан л бол төлбөрийг барагдуулах нь гарцаагүй.
Валютын ханш өсч, эдийн засаг хүндэрсэн энэ үед “май” гээд сарвайчих бяд Засгийн газарт байгаа бил үү. “Эрдэнэт”-ийг дур мэдэн банкинд барьцаалсан эрх мэдэлтнүүд, мөнгө зээлээд эргэн төлөлт хийгээгүй Ш.Батхүү нарт хэн хариуцлага тооцох вэ. Ард түмний өмнөөс ярьдаг эх оронч гишүүд минь олоод ирсэн хувийг биш, алдах гэж байгаа асуудалдаа анхаарлаа хандуулмаар байна шүү.
Ё.Бат-Эрдэнэ
МЭДЭЭНИЙ СЭТГЭГДЭЛ
ХОЛБООТОЙ МЭДЭЭ
Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.
Copyright © MMINFO.MN All Rights Reserved. Powered by HUREEMEDIA.
