Монгол Улсын эрчим хүчний аюулгүй байдлыг бэхжүүлэх стратегийн ач холбогдол бүхий Бөөрөлжүүт цахилгаан станцын төслийг “Цэцэнс Майнинг энд Энержи” ХХК хэрэгжүүлж буй. Импортын цахилгаан эрчим хүчний хараат байдлыг бууруулж, салбарын найдвартай, тогтвортой байдлыг хадгалахад уг төсөл онцгой чухал үүрэгтэй.

2025 онд Бөөрөлжүүт цахилгаан станцын I болон II блок бүрэн хүчин чадлаар буюу нийт 300 МВт-аар ажиллаж эхэлснээр 1 тэрбум кВт.ц цахилгаан эрчим хүч үйлдвэрлэн, Монгол Улсын нийт цахилгаан эрчим хүчний хэрэглээний ойролцоогоор 30 хувийг дангаараа хангаж ажилласан. Энэ нь 963 мянга орчим өрхийн жилийн хэрэгцээг хангах хэмжээний цахилгаан эрчим хүч үйлдвэрлэх хүчин чадалтай тэнцэх үзүүлэлт юм.

Төвийн бүсийн нэгдсэн системд Бөөрөлжүүтийн цахилгаан станцын нэг, хоёрдугаар блокоос одоогоор 300 МВт цахилгаан эрчим хүч нийлүүлж байна. Тус станцын 150 МВт-ын хүчин чадалтай гуравдугаар блокийг 2027 онд, мөн ийм хэмжээний хүчин чадалтай байх дөрөвдүгээр блокийг нь 2028 оны эцэст ашиглалтад оруулахаар төлөвлөж буй юм. Гуравдугаар блокийн барилга угсралтын ажил хуваарийн дагуу үргэлжилж байна.