Энэ хаврын улс төр халуухан болно гэдгийг бид биш учир мэдэх хүмүүс хэлж байгаа. Халуухан хаврын улс төр  Г.Занданшатарын Засгийн газрыг ч тойрохгүй, дайрах нь лавтай.  Засгийн газар бүрэлдэхүүнээрээ унахгүй юм гэхэд 2-3 сайд, цаашлаад нэг нам сугарч үлдэх магадлалтай байна.  ХҮН нам Засгаас гарч, Үндэсний эсвэл Засагт хамтрах уу гэсэн яриа сонсогдож эхлэв. 

ХҮН намын дарга, Шадар сайд Т.Доржханд хоёр ч Засгийн газарт сайдын бүрэн эрхийг хэрэгжүүлэн ажиллаж байна.   Түүнтэй хамт ХҮН намаас Боловсролын салбарыг Б.Наранбаяр удирдаж байгаа.   Гэвч энэ хоёр сайдын нэр хүнд, бодлогын үзүүлэлт Төрийн ордонд ч, Төрийн ордны гадна ч сайн биш, бүр муу байгаа нь нууц биш. Шадар сайд Т.Доржхандын хувьд эрчим хүчний реформ хийнэ хэмээн ярьж сайдын суудалдаа нэг хэсэг ихэд тухтай шигдэж байв. Гэвч энэ өвөл нийслэл “гал алдаж” ерөнхийдөө Т.Доржханд сайд дүнгээ тавиулчихсан. Дараа нь үнийн өсөлтийг хянах ажлын хэсгийг ахалж ажиллав.  Өнөөдөр үнийн өсөлт манай иргэдийн амьдралд хэрхэн нөлөөлж байгаа нь мөн л түүний “гавьяа”.  Гэвч Т.Доржханд сайд тас гүрийж, улстөржиж, “тэнгэр” дээрээс асуудлыг харсан хэвээр л байна.  Боловсролын сайд Б.Наранбаяр ч хариуцлага хүлээх сайд нарын нэгд аль хэдийн орчихсон.  Тэгэхээр ХҮН намын Засгаас гарахад гайхах зүйл алга. 

Нөгөө талаар Үндэсний эвсэл бол эрх баригч намын нэг салаа мөчир.  Үндэсний эвслийн дарга Н.Номтойбаярыг дэмжигчид МАН-ын удирдах түвшинд олон бий. Н.Номтойбаярын улс төрийн карьер эрх мэдлийн төвд ойр гэж хэлж болно.  Тэр “Үндэсний эв нэгдэл” гэх томьёоллыг улс төрийн шинэ талбар болгохыг эрмэлзэж яваа.  Харин Засагтай хамтарч орох нь түүний энэ үзэл санаатай хэр нийцэх үү гэдгээс л бүх зүйл шалтгаалах биз. 

Эх сурвалж: “Зууны мэдээ” сонин

2026 ОНЫ ХОЁРДУГААР САРЫН 25. ЛХАГВА ГАРАГ. № 35 (7777)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn