Шинэ оны босгон дээр төрийн гурван өндөрлөг олон нийтэд хандан, мэндчилгээ дэвшүүлдэг.   Тэд мэндчилгээндээ ямар агуулгыг тодотгож, шигтгэж, ямар биеийн хэлэмж үзүүлэх вэ гэдэгт олон нийт анализ, дүгнэлт хийх нь бий.  Тэгвэл Ерөнхийлөгч У.Хүрэлсүх,  УИХ-ын дарга Н.Учрал,  Ерөнхий сайд Г.Занданшатар нар энэ жил шинэ оны мэндчилгээгээрээ дамжуулан юу гэж амласныг онцлон хүргэж байна.

Ерөнхийлөгчийн “анхааруулга”

Ерөнхийлөгч У.Хүрэлсүхийн шинэ жилийн мэндчилгээ тун даруухан байлаа. Түүний мэндчилгээнд ирээдүйн амлалт бараг үгүй.  Улстөржсөн өнгө аяс, эдийн засгийн тухай дүгнэлт байсангүй. Харин анхааруулга маягийн агуулга багтаасан нь “Сүүлийн жилүүдэд хүн төрөлхтөн, дэлхий нийтээрээ геополитик, геостратегийн ээдрээтэй цаг үеийг туулж, зөрчил мөргөлдөөнтэй дэлхий ертөнцөд амьдарч байна.

Энэхүү олон улсын нөхцөл байдал манай улсын эдийн засаг, ард түмний ахуй амьдралд сөргөөр нөлөөлж байгаа ч 2025 он монголчууд бидний хувьд гадаад харилцаа, хамтын ажиллагаагаа өргөжүүлэн хөгжүүлсэн үйл явдлаар дүүрэн он байлаа” гэв.  Мөн тэрээр “Хүнсний хувьсгал” үндэсний хөдөлгөөний хүрээнд 53 хүнсний үйлдвэр шинээр ашиглалтад орж, 1000 гаруй нэр төрлийн хүнсний бүтээгдэхүүнийг зах зээлд шинээр нийлүүллээ. Буянт  мал сүргийнхээ түүхий эдийг боловсруулж, эдийн засгийн эргэлтэд оруулах зорилготой “Цагаан алт” хөтөлбөр амжилттай хэрэгжиж, бодит үр дүн гарч эхэллээ” хэмээн төслүүдийнхээ үр дүнгийн талаар дурдав. 

Ингээд ирж буй шинэ ондоо төр, засаг, түмэн олноороо ололт, амжилтаа улам бататгаж, алдаа оноогоо дүгнэн цэгнэж, эвийг эрхэмлэж, зөвийг тэтгэж, ёсыг сахиж, улс Монголоо хөгжүүлэхийн төлөө улс үндэстнээрээ хамтдаа хичээн зүтгэцгээе хэмээн уриалж,  Даян дэлхий амар амгалан байх болтугай гэдэг агуулгыг шигтгэсэн байлаа.

УИХ-ын дарга Н.Учрал “чөлөөлөх”-өө амлав

Парламентын спикерээр томилогдоод нэг сар гаруйхан хугацааг үдээд байгаа УИХ-ын дарга Н.Учралын шинэ жилийн мэндчилгээ нэлээд өвөрмөц байлаа. Тусгай хэрэгцээт хүүхдийн цэцэрлэг дээр ажиллах явцдаа шинэ жилийн мэндчилгээ дэвшүүлсэн юм. Монголын ирээдүй болсон хүүхэд багачуудынхаа амьдрах, сурах, боловсрох эрхийг төр бүрдүүлэх ёстой гэдэг мессежийг өгөв.

Тэрээр “2026 онд УИХ хүний эрх, хүүхдийн эрхийн торгон мэдрэмжтэй байж, “Чөлөөлье” үзэл санаан дор төрийн хууль, бодлогоор иргэний, улс төрийн, эдийн засгийн эрх, эрх чөлөөг дархлан хамгаалж ажиллана” гэж амлав. Мөн “Чөлөөлөх бодлого бол Монгол Улсын Үндсэн хуульд заасан иргэний 59 эрх, эдийн засгийн 24 эрх, улс төрийн 14 эрхийг баталгаатай эдлэх эрх эрхийг хангахын төлөөх эрх зүйн эрүүл орчныг бүтээх багц төлөвлөгөө юм.

Чөлөөллийн санаачилга бол төрийн хүнд суртлаас хүний эрх, эрх чөлөө, иргэдийнхээ эдлэх ёстой эрхийг чөлөөлөхийн төлөө олон талаас нь шүүн тунгааж бодож боловсруулсан иж бүрэн стратеги юм. Учир нь “хүний эрх таны эрх, улсын эрх иргэний эрх” гэдгийг онцолсон юм. 

Ерөнхий сайд Г.Занданшатар баялгийг тэгш хуваарилна

Ерөнхий сайд Г.Занданшатар Төрийн ордон байрлах албаны өрөөнөөсөө шинэ жилийн мэндчилгээ дэвшүүллээ. Түүний мэндчилгээ яг зургаан минут үргэлжилсэн. Тэрээр мэндчилгээнийхээ эхэнд “Нэг хүнд ногдох ДНБ 7100 ам.доллар, гадаад валютын нөөц долоон тэрбум ам.доллар, зээлжих зэрэглэл нэмэгдэж Монгол Улсад итгэх итгэл эрс сэргэсэн” хэмээн онцоллоо. 

Түүнчлэн нүүрсний 581 гэрээг ил болгож, авлига албан тушаалын гэмт хэрэгтэй хийх тэмцлийн хүрээнд 160 гаруй тэрбум төгрөгийн хохирлыг нөхөн төлүүлж 85 тэрбум төгрөгийн эд хөрөнгийг битүүмжлээд байгаа гэв.  Мөн “Төгрөг нуур”, “Төмөртэйн овоо” зэрэг ордуудыг төрдөө буцааж авсан. Стратегийн ордууд болон “олон овоод”, “Бор тээг”-ийн ордуудыг эдийн засгийн эргэлтэд оруулж, хүүхэд, ахмад настнууд, хөгжлийн бэрхшээлтэй иргэддээ үр өгөөжийг нь бодитойгоор хүртээнэ” гэж амлалаа.

Мөн Засгийн газар иргэдээ хуурч, бодит байдлыг гоёж будахгүй. Мөн гарч буй ахиц дэвшлийг үгүйсгэж, итгэл найдварыг мохоохгүй” гэсэн үгийг шигтгэлээ.

Эх сурвалж: “Зууны мэдээ” сонин

2026 ОНЫ НЭГДҮГЭЭР САРЫН 5. ДАВАА ГАРАГ. № 1 (7743)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn