Өвөрхангай аймгийн Арвайхээр суманд өчигдөр орой орсон усархаг, аадар борооны улмаас Дэлгэрэх гол үерлэж, нийтийн эзэмшлийн зам, хашаа, талбай эвдэрчээ. Энэ талаар ОБЕГ-аас "Үерийн улмаас долоон гэр, дөрвөн машин урсаж, хоёр гэр, арван хашаа нурсан ба 10 гаруй барилга, байшин усанд автсан, бохирын цооног хальсан гэх дуудлага аймгийн Онцгой байдлын газарт ирсэн. Дуудлагын дагуу Онцгой байдлын газар, Цагдаагийн газар, Арвайхээр сумын ЗДТГ, “Онги ус суваг” ОНӨҮГ, “Өвөрхангай АЗЗА” ТӨХК зэрэг холбогдох байгууллагуудын алба хаагчид шуурхай ажиллаж, усыг соруулах, лагийг зайлуулах, эвдрэл, гэмтлийг арилгахаар ажиллаж байна. Мөн Арвайхээр сумаас зүүн тийш 7 км орчимд уулын үер бууж, зам усанд боогдсоны улмаас зорчих хөдөлгөөнийг түр зогсоож, бороо зогссоны дараа нээсэн бөгөөд сэргээн босгох ажлын хэсгийг байгууллаа" гэв.

Өвөрхангай аймгийн УЦУОШТ-өөс "2023 оны долдугаар сарын 11-ний өдрийн байдлаар Хангай нурууны зүүн хойд хажуугаас эхтэй Орхон гол нь Бат-Өлзий сумын орчим усны түвшин олон жилийн дунджаас 30 см-ээр их, усны дундаж гүн 45-85 см байгаа бол Хархорин сумын орчим усны түвшин олон жилийн дунджаас 5 см бага, оройдоо усны түвшин нэмэгдэнэ, усны дундаж гүн 50-100 см байна. Хангай нурууны өврөөс эхтэй Онги гол Уянга сумын орчим олон жилийн дунджаас 25 см их, усны дундаж гүн 35-60 см байгаа бол Арвайхээр сумын орчим олон жилийн дунджаас 70 см их, үерийн аюултай түвшинг 10 см давсан, усны дундаж гүн 55-100 см.

Хангай нурууны өвөр хажуугаас усжих Таац гол Нарийнтээл сумын орчим усны түвшин олон жилийн дунджаас 15 см бага, усны дундаж гүн 25-30 см байна. Сангийн далай нуураас эхтэй Зэгстэй гол нь Өлзийт сумын орчим усны түвшин олон жилийн дунджаас 15 см их, усны дундаж гүн 15-45 см байна. Хөгшин Орхон гол Хархорин сумын орчим усны түвшин олон жилийн дунджаас 10 см их буюу усны дундаж гүн 35-45 см байна" хэмээн мэдээллээ.