Ирэх арваннэгдүгээр сарын 8-нд  АНУ-ын Ерөнхийлөгчийн сонгуульд нэр дэвшигчдийн хамгийн анхны халз тулаан орон нутгийн цагаар өчигдөр 21.00 цагт эхэлсэн  билээ. Тус мэтгэлцээнийг дэлхий даяар 100 сая орчим хүн хүлээн авч үзсэн юм.

Тэгвэл мэтгэлцээнд Доналд Трамп болон Хиллари Клинтон нарын дагуулан ирсэн хүмүүс ч олны анхаарлыг нэлээд татлаа. Тодруулбал, Хиллари энэ удаад нөхөр Билл Клинтон, охин Челсигээ дагуулан ирсэн бол Трамп эхнэр Милани болон хүүхдүүдээ авчирчээ. Үүнээс гадна мэтгэлцээн эхлэхээс эхлээд төгсгөл хүртэл өрсөлдөгчийнхөө сул талыг хөндөн буулган авахыг хичээж байсан Трамп нэгэн онцгой зочдыг  урьсан байв.  Тэр нь Хиллариг АНУ-ын Төрийн нарийн бичгийн даргаар ажиллаж байх үед Ливийн Бенгазид гарсан тус улсын Элчин сайдын яамыг онилсон халдлагын амьд гэрчүүд  юм.  Тэрбумтан эр улстөрийн асар их туршлага бүхий бүсгүйн бодлого алдаатай байсныг урьсан зочдоороо дамжуулан илэрхийлэхийг хүсчээ.