Дорнод аймагт энэ сарын эхээр хүний санаанд багтамгүй жигшүүрт хэрэг гарчээ. Тодруулбал, долоо настай, хоёрдугаар ангийн сурагч учир битүүлгээр амиа алдсан. Цагдаагийн байгууллагаас утасны цэнэглэгчээр хоолойгоо боож амиа хорлосон гэж үзсэн аж, эхэндээ.

Гэвч мөрдөн байцаалтын явцад санаатайгаар амь насыг нь хөнөөсөн онц ноцтой гэмт хэрэг болох нь илэрчээ. Долоохон настай бяцхан хүүгийн аав гэр бүлээс гадуурх харилцаатай байсан нь энэхүү аймшигт хэрэг гарахад нөлөөлжээ.

Тодруулбал, талийгаач хүүгийн аавтай дотно харилцаатай байсан С гэгч эмэгтэй бусдад 200 мянган төгрөг өгч, захиалгаар амь насыг нь хөнөөлгөсөн байж.  Хүүгийн амь насыг хөнөөлгөх захиалга өгсөн С гэгч эмэгтэй өөрөө ой гарантай нялх хүүхэдтэй юм байна. Одоогоор хүүгийн аав болон амраг эмэгтэйг нь хамт шалгаж байгаа ажээ.

Мөн маргааш Дорнод аймгийнхан гэр бүлээс гадуурх харилцаанаас болж амиа алдсан бяцхан хүүд зориулж зул өргөх юм байна.

Н.Болд