Аяганы хариу өдөртөө агтны хариу жилдээ  гэдэг дээ. Аугаа эх орны дайны жилүүдэд  БНМАУ бүхнийг фронтод уриан дор морьдынхоо дөмгийг илгээж,  ажилчин  анги фронтын дайчдыг монгол хонины эсгийгээр хийсэн гутал,  нэхий дээл, хөвөнтэй бээлийгээр хангаж байсныг шинэ оросууд мэддэг л юм байна. Цар тахал газар авч, хүний нутагт халаасны мөнгөгүй тэвдэж байсан монголчуудад оросууд дахиад л тусламжийн гараа сунгаж,  тусгай үүргийн онгоц илгээн эх оронд нь хүргэж ирсэн.  Олон хүн  Оросын ард түмэнд тэр дундаа ОХУ-ын Батлан хамгаалахын сайд Сергей Шойгуд талархаж суугаа.  Гэхдээ эл асуудал сэтгэлийн хөөрлөөр шийдэгдсэн зүйл огт биш. Хүн хоорондын найрсаг харилцаанаас үүдэлтэй гэдгийг энд онцлох байна. 

 

Ялалтын баярын өмнөхөн  Батлан хамгаалахын сайд Н. Энхболд ОХУ-ын Батлан хамгаалахын сайд Сергей Шойгутай   онлайнаар холбогдох үедээ  ОХУ-д цэргийн их, дээд  сургуулиудалд сурч буй монгол сонсогчдыг эх оронд нь авчрах тухай  асуудлыг хөндсөнөөр  энэ сарын 6-ны өдөр Оросын батлан хамгаалахын яамны зардлаар монгол оюутнууд эх орондоо хөл тавьсан нь энэ. 

 

Сергей Шойгу  бидэнтэй онцгой холбоотой хүн. Тува гаралтай түүнийг  монголчууд гарал үүсэл нэгтэй хэмээн хүндэлдэг.  ОХУ-ын Ерөнхийлөгч В.Путин манай улсад хэд хэдэн удаа айлчилсан.  Үүнд С.Шойгугийн  нөлөө байсан гэж улс төрийн хүрээнийхэн хэлэх юм билээ. Мань Шойгу  хамгийн сүүлд 2018 онд Улаанбаатар айлчлахдаа манай батлан хамгаалахын салбарт 13 сая  ам.доллартай тэнцэх зэвсэг техник өгөх гэрээнд гарын үсэг зурсан байдаг.  

 

С.Шойгу бол Ерөнхийлөгч В.Путины итгэлийг даасан хамтран зүтгэгчдийн нэг бөгөөд энэ нь ч хоёр улсын харилцааг идэвхжүүлэхэд багагүй нөлөөлдөг.

 

ОХУ-ын цэргийн их, дээд сургуулиудад суралцдаг оюутнуудыг  нутагт нь  хүргэж ирсэн ач тусыг шинэ цагийн монголчууд ч мартахгүй биз ээ.

 

Д.ДАМБА