Монголчууд бид цөөхүүлээ гэвч аймшигт “тахал” хаяанд биш хойморт минь заларчихлаа. Энэ бол “хар тамхи”. Бид одоо яах вэ.

Олны танил эрхмүүдээс гадна онгироо ойворгон зантай өсвөр насны бацаан нар хүртэл энэ муухай зүйлийг хүртэж, мансуурч элийрч байна. Энэ оны эхний хагасын байдлаар хар тамхи, мансууруулах бодистой холбоотой 89 хэрэгт 186 хүн холбогдон шалгагдсан талаар Цагдаагийн ерөнхий газрын Хар тамхитай тэмцэх газрын дарга, цагдаагийн хурандаа Ж.Эрдэнэболд хэлж байсан. Энэ тоо бол хар тамхи гэх аймшигт зүйл хаалга тогших бус, хажууд минь ирснийг илтгэх тоо. Хамгийн аймшигтай нь ийм төрлийн гэмт хэрэгт холбогдож байгаа хүмүүсийн олонхи нь 18-35 насныхан байх ба түүнээс бага 14-16 насныхан ч байгаа гээд бод доо. Тэгээд зөвхөн Улаанбаатарт гэлтгүй хөдөө орон нутагт ч ийм хэрэг бүртгэгдсээр байгаа нь хар тамхины хэрэглээнд хил хязгаар тогтооход ч бэрх болсныг илтгэж байна.

Энэ муухай зүйлийг хэрэглэдэг болсноор хүний бие өлсөж ундаасч буй мэтээр дотроос нь нэхэж, донтуулдаг болохыг хүмүүс хэлдэг. Залуус нь сэтгэцэд нөлөөлөх элдэв зүйл ууж, үнэрлэж донтсоор байвал Монголын ирээдүй яах вэ. Үндэсний аюулгүй байдал минь яах билээ.

Монголын ирээдүй, үндэсний аюулгүй байдал гэж том ярихаа байя гэхэд тэдний гэр бүл, үр хүүхэд, өөрийнх нь ирээдүй яах вэ. Бодохоос ч аймшигтай дүр зураг Монголд зөндөө гарч байна.

Гэтэл олны танил гэх зарим эрхмүүд “Тэр өвсийг нь хуулиараа хүлээн зөвшөөрчихөд яадаг юм” хэмээн цахим сүлжээнд элийрч суухыг хараад үнэхээр их эгдүүцэл төрөв. Ийм хүмүүсийг хүүхдүүд минь харж, ийм нийгэмд өсч байгаад нь харамсаад барахгүй нь...

Хар тамхи гэх зүйл нэгэнт аюулын харанга дэлдчихлээ. Олны танилууд нь хэрэглэж, хэрэглэхийг уриалж, дипломатууд нь юу ч болоогүй мэт өөрсдөө тээвэрлэж, хил гаалийн хорио цээрийг хянах ёстой албад нь хахуул авч оймсондоо ам.доллар нууж байгаа ийм нийгэмд бид хүүхдүүдээ яаж хар тамхинаас хол өсгөх вэ. Энэ бол зүгээр нэг гаслаад суух зүйл биш, үүний эсрэг хамтдаа тэмцэх цаг нь болжээ гэж уриалмаар байна. Яг одоо биш бол бид Монголоо, ирээдүйгээ аварч чадахгүй нь.