"Хэвтүүл" ард түмний хөдөлгөөнөөс ЖДҮХС-гаас зээл авсан албан тушаалтнуудтай хариуцлага тооцохыг шаардан бүх нийтийн жагсаал зохион байгуулахаа мэдэгдэж өнөөдөр мэдэгдлээ.

Тэд Жижиг, дунд үйлдвэрийг хөгжүүлэх сан, “60 тэрбум”-ын хэрэг, концесс, тендерийн хэрэгтэй ямар нэг байдлаар нэр холбогдсон өндөр  албан тушаалтнууд ард түмний өмнө хуулийн хариуцлага хүлээхийг шаардаж буйгаа илэрхийллээ. Тиймээс үүнийг шаардаж ирэх сарйн 2-ны өдөр Сүхбаатарын талбайд тайван жагсаал зохион байгуулах болсноо дуулгасан юм.

“Хэвтүүл” хөдөлгөөний тэргүүн Э.Тамир  “ЖДҮХС-ийн асуудалтай хэргийг намдаахын тулд 60 тэрбумын хэргийг ярьж,  ЖДҮ-г орхигдуулж, энгийн нэг жижиг зээл мэтээр ард иргэдэд ухуулж байна. Тэд бага хүүтэй зээл авч болж байхад бид яагаад жирийн ард иргэд авч болдоггүй юм. Тэр утгаар ЖДҮХС -ийн асуудал сөхөгдсөн цагаас эхлэн идэвхтэй тэмцсээр ирсэн хэсэг залуус нэгдсэн "Хэвтүүл" хөдөлгөөнийг эхлүүлж байна.

Цаашдаа ч энэ хөдөлгөөнөө үргэлжлүүлнэ. Ардчиллын суурь үнэт зүйлсэд илтэд заналхийлсэн үг, үйлдлийг эрх баригчдын зүгээс гаргах боллоо. Эрх баригчдын зүгээс ЖДҮХСанг хувьдаа завшсан улс төрчидтэй хариуцлага тооцох нь бүү хэл, харин ч хаацайлж, өмгөөлж хамгаалсаар өдий хүрлээ. Ингээд зогсохгүй ЖДҮ хулгай болон, 60 тэрбумын сүлжээгээр барьцаалагдсан УИХ, Засгийн газрын гишүүдээрээ дамжуулан ШХАБ-д элсэх урвагч санаагаа гүйцэлдүүлэхээр улайрч байна. Энэ байдлыг энэ хэвээр нь дуусгаж болохгүй" гэж мэдэгдсэн юм.