Гүргэр даргаа огцруулахаар УИХ хуралдаж болох бүхий л хурлаа хийж, жирийн иргэд нь идэр есийн хүйтэнд төв талбай дээрээ гарч жагсаад ч бардаг юм биш.

М.Энхболд “УИХ-ын даргыг ажлаас нь чөлөөлөх таван үндэслэл бий. Тэр тавын алинд нь ч би багтахгүй байна. Тиймээс би хуулийн дагуу ажлаа үргэлжлүүлэн хийж байна” гээд тас гүрийчихэв. Эцэст нь Монгол Улсын Ерөнхийлөгч Х.Баттулга УИХ-ын дэгийн тухай хуульд өөрчлөлт оруулах тухай хуулийн төслийг УИХ-д өргөн барьж, түүнийгээ Үндэсний аюулгүй байдлын зөвлөмжийн дагуу УИХ-ын чуулганаар шуурхай хуралдуулж хэлэлцүүлсэн. Гишүүдийн олонхи нь уг хуулийн төслийг дэмжчихсэн.

Хуулийн төслийн гол санаа нь УИХ-ын гишүүдийн олонхи нь УИХ-ын даргыг огцруулах санал гаргасан бол түүнийг хэлэлцэх, батлах ёстой гэх утгатай. Өөрөөр хэлбэр М.Энхболдыг огцруулах хуулийн төслийг Төрийн тэргүүн маань өргөн бариад хэлэлцүүлж батлуулчихаад байхад тэр гүрийсээр, суудалдаа суусаар л байна.

Түүнийг огцруулах гээд байгаа шалтгаан нь ч их тодорхой. Албан тушаалын болон газрын наймаа хийдэг болохыг гишүүд өөрсдөө олон нийтэд гаргаж ирсэн, заримыг нь бүр баталсан. Гэтэл түүнийг газар доогуур ортол нь чичилж, элдэвлэж байсан зарим гишүүд түүнтэй эвлэрсэн гэх яриа ч олны дунд гарсаар байна.

Тэдний эвлэрэх, хагаралдах нь бидэнд огт падлийгүй. Гагцхүү төрийн ажил цалгардахгүй, түмний амьдрал дээшилж байвал болох нь тэр. Гэхдээ одоогийн УИХ-ын дарга М.Энхболдод олон олон “Но” бий гэдгийг хүн бүхэн мэдэх болсон. Түүнийг шударга бусын хонгил гээчийг бий болгосон хүн гэдэгтэй хүн бүр санал нийлэх болсон. Тиймээс төрд ийм хүн байх ёсгүй. Түүнийг огцруулах ёстой.

Түүнийг огцруулчихаад, УИХ-ын дараагийн даргаар шинэ залуу, эсвэл эмэгтэй хүн сонгон томилмоор байна. Дэлхийн томоохон улсуудыг эмэгтэйчүүд удирдаж байна. Ялангуяа Европын улсуудын сайхан жишгүүд байна. Эмэгтэйчүүдээр удирдууллаа гээд тэд муудаагүй, харин ч биднээс илүү хөгжиж, биднээс хэдэн арван алхмын урд явж байна.

Монгол бүсгүйчүүдийн ухаан харин ч эрчүүдээс хол явуулж мэднэ шүү. Тэд ууж идсэн ч арай жудагтай байх болов уу. Эрчүүдээ хүндэлж, тахин шүтдэг монголчууд маань хангалттай их молигодуулж, хангалттай их хохирлоо. Одоо хангалттай.

Ухна ишиг шиг эрчүүдээр бус ухаалаг бүсгүйчүүдэд төрийн жолоогоо атгуулахсан.