Засгийн газрын Хэрэг эрхлэх газраас төрийн албан хаагчдыг атестатчилах ажлыг улсын хэмжээнд өрнүүлж эхэлсэн. Монгол Улсын 21 аймаг, нийслэлийг хамарсан төрийн албаны энэхүү шалгалтыг зохион байгуулахаар ажлын хэсэг байгуулж, ЗГХЭГ болон яамдын албан тушаалтнууд ойрын өдрүүдэд орон нутагт ажиллаж байгаа юм.

Тэгвэл орон нутагт шалгалтаар явж байгаа алба хаагчид өчигдөр орой зам тээврийн осолд орсон харамсалтай мэдээ байна. Тодруулбал, Засгийн газрын Хэрэг эрхлэх газар болон Сангийн яамны албан хаагчид Завхан аймгаас Архангай аймаг хүрэх замдаа буюу Солонготын давааны орчимд осолджээ.

Энэ талаар Тээврийн цагдаагийн албанаас тодруулахад “Завханы Тосонцэнгэлээс 130 аад км-т Солонготын давааны өвөрт орой 20.30 цагийн үед осол гарсан нь үнэн. Ланд крузертэй дөрвөн хүн явж байсан бөгөөд гурав нь эрэгтэй нэг нь эмэгтэй хүн байжээ. Гурвынх нь биеийн байдал гайгүй байгаа бол эмэгтэй нь ухаан ороогүй байна. Тэднийг нисдэг тэргээр авчрахаар болсон. Ослын урьдчилсан шалтгаан нөхцөл нь гүүрний далангийн эрэг мөргөснөөс болж осолдсон” гэв.

Осолд орсон алба хаагчид Архангай аймгийн Цахир суманд байгаа бөгөөд одоо хот руу нисдэг тэргээр авчрах гэж байна.