УИХ-ын хаврын чуулганы нээлт маргааш болох товтой. Намрын чуулганаар хэлэлцээгүй үлдээсэн болон шийдвэрлэж чадаагүй асуудлуудаас гадна олон олон хуулийн төслүүдийг хэлэлцэхээр бэлтгээд байгаа билээ. Нам гүм байсан улс төр “сэрэх”-тэй  зэрэгцэн жагсаал цуглаан, улс төрийн суултууд ч шил шилээ даран хөвөрдөг. Тухайлбал, чуулган эхлэх эсэхийг бүрхэгдүүлж мэдэх улс төрийн нэгэн суулт маргааш болох бололтой. Тодруулбал, “Улсаа аврах ард түмний үндэсний хөдөлгөөн”-ийхөн маргааш буюу Төрийн ордны баруун, зүүн хаалганы үүдэнд улс төрийн суулт хийж, ордон руу Ерөнхийлөгчөөс өөр хүн оруулж гаргахгүй гэдгээ хэвлэлийн хурал хийж мэдэгдээд байгаа билээ.

Тус хөдөлгөөнийхний хэлж буйгаар  “Одоогийн УИХ Монгол Улсын аюулгүй байдал, хил хязгаар, газар нутгийн бүрэн бүтэн байдал, иргэдийн эрх, эрх чөлөөнд ноцтой аюул занал учруулаад зогсохгүй, баялгийн тэгш бус хуваарилалт бий болгож, үндэсний эв нэгдлийг сарниулсан” гэж үзэж байгаа аж.  Тиймээс тус хөдөлгөөн болон “Монголын нам бус иргэдийн нэгдсэн холбоо”-ны залуус нэгдэж УИХ-ыг тарахыг тулгасан шаардах хуудсыг УИХ-ын дарга М.Энхболдод өргөн барьж, мөн Ерөнхийлөгчөөс онц байдал зарлахыг шаардаж байгаагаа илэрхийлэхээр ийнхүү улс төрийн суулт хийхээр болжээ.

Түүнчлэн “Улсаа аврах ард түмний үндэсний хөдөлгөөн”-ий ерөнхий зохицуулагч Б.Жагар “Манай хууль хяналтын байгууллага өөрсдөө оффшорчдын гар, хөл болсон учраас шударга үнэнийг тогтоож чадахгүй байна. Өнгөрсөн шөнө С.Баярцогтыг барьж хорьсон нь зүгээр л түр зуурын шоу. Яг энэ засаглал байгаа цагт хэзээ ч тэр хүн шоронд орохгүй. Харин бидний үеийн залуус хувьсгал хийх юм бол бүх хулгайч нарыг байх ёстой газар нь аваачиж чадна” хэмээн үзэж байгаа аж.

Ийнхүү Намрын чуулган завсарлаж, хаврын чуулган эхлэх хооронд өөрсдийн тойрогтоо ажиллаж байсан УИХ-ын гишүүдийн цугларалт эхлэхтэй зэрэгцэн улс төрийн тогоо буцалж эхлэх нь тэр. Төрийн ордон, чуулганы танхим нь хэрүүлийн талбар, Нийслэлийн төв талбай нь жагсаал, цуглааны талбар болж  “Хаврын синдром” эхэлдэг үе ийнхүү ирлээ. Хаа хаанаа багахан синдромтоосой билээ.