Өнөөдөр шинийн 6. Сар шинэ хуучирч байна. Өнгөрсөн баярын өдрүүдэд гадуур бараг л согтуу хүн харагдсангүй. Айлд золголт хийгээд очиход ч архи ууж байгаа хүн төдийлөн харагдсангүй. Дийлэнх нь очих айл олонтой, жолоо барьж байгаа гээд ухамсраараа архинаас эвтэйхэн татгалзаж байв. Зорьж ирсэн зочид гийчдээ учир мадаггүй архиар шахдаг айл ч ховордож. Нэг ёсондоо монголчууд зөв сайхан баярлаж чаддаг болжээ.

2000 оны эхээр архи гээчийг ундаа ус шиг ууж, ямар баяр болж байгааг, хаана явж байгаагаа ч мэдэхгүй шахам яваа хүмүүс гудамжинд олон тааралддаг байсан. Гэтэл сүүлийн жилүүдэд энэ үзэгдэл илт багассан нь баярлууштай. Албаныхны өгсөн мэдээллээс согтуугийн дуудлага баярын өдрүүдэд өнгөрсөн оны мөн үетэй харьцуулахад 57.6 хувиар буурсныг харж болохоор байгаа юм. Монголчууд маань идээ ундаа элбэг байна гээд ухаан санаагаар самууртал уухаа больж, айргаа тааваараа уудаг болсныг баярын энэ өдрүүд нотоллоо.

Түүнчлэн цагдаа нар ч ажлаа сайн хийж, биднийг тайван сайхан баярлахад асар их нөлөөлсөн. Тухайлбал, Сар шинийн баяр, амралтын өдрүүдэд Нийслэлийн цагдаагийн газар, харьяа дүүрэг дэх цагдаагийн хэлтэс, төвүүдийн бие бүрэлдэхүүн өндөржүүлсэн бэлэн байдалд шилжин ажиллажээ.

Гэмт хэрэг, зөрчлөөс урьдчилан сэргийлэх, гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах чиглэлээр цагдаагийн алба хаагчид олон нийтийн цагдаа, Хууль сахиулахын их сургуулийн сонсогчид, урамшилт эргүүл гудамж талбай, олон нийтийн газарт авто болон явган эргүүлийн үүрэг гүйцэтгэн 132 гэмт хэргийг халуун мөрөөр нь илрүүлсэн гэх сайхан мэдээг ажлын нохой жилийн ажлын анхны өдөр бидэнд дуулгасан юм.

Тэд бүрэн бүрэлдэхүүнээрээ ард иргэдийнхээ аюулгүй байдлын төлөө хүчин зүтгэсний үр дүнд цагдаагийн байгууллагад бүртгэгдсэн дуудлага, мэдээллийг өмнөх оны мөн үетэй харьцуулахад 24.4, гэмт хэргийн дуудлага 33.2, зөрчлийн дуудлага 36.6, согтуугийн дуудлага 57.6 хувиар тус тус буурсан байна.

Мөн архи, согтууруулах ундаа хэтрүүлэн хэрэглэсэн 672 хүнийг эрүүлжүүлж, 960 иргэнийг ар гэр асран хамгаалагчид нь хүлээлгэн өгч, учирч болох эрсдэлээс урьдчилан сэргийлж ажиллажээ. Ингэснээр бид хэн нэгэн энд тэнд хөлдсөн осгосон гэх хар мэдээлэлгүй нохой жилтэйгээ золгосон юм.

Замын цагдаагийнхан ч үүргээ сайн биелүүлж, өнөөх хотын зах руу өчнөөн цагаар түгжирдэг үе аль хэдийн өнгөрснийг сануулав. Тухайлбал, “Зүүн салаа” руу явдаг замд одоогоос 2.3 хэдэн жилийн өмнө 4-6 цаг түгжирч, түгжрэлд орсон зорчигчид тэр хавийн дэлгүүрүүдийн талх бооорцогнууд нь дуусгаж байсан үе одоо үгүй болсныг сануулав. Бараг худал хэлсэн хүнд энэ жил тав алхаад л нэг цагдаа зохицуулалт хийж байсан. Тэгсний хүчинд хүмүүс түгжрэл гээчийг мэдрэхгүй зорьсон газраа хүрцгээж байсан.

Цахим ертөнцөд хүмүүс өөр өөрсдийнхөөрөө Цагаан сарын сэтгэгдлээ үлдээж, тэд замын түгжрэл бага байсныг, согтуу хөлчүү хүн бараг олж харсангүй гэх эерэг постууд дийлэнхий хувийг эзэлж байсан юм. Тиймээс ард иргэдийнхээ аюулгүй, сэтгэл амар баярлах нөхцөл боломжийг хангахын төлөө өөрсдөө ч баярлаж чадаагүй, бүрэн бүрэлдэхүүнээрээ ажилласан Цагдаагийн байгууллагын бүхий л албан хаагчиддаа нийслэлчүүдийнхээ өмнөөс баярласнаа илэрхийлье. Цагдаа нартаа баярлалаа.