Хар тамхи мансууруулах бодисын нэг төрөл болох “ICE” буюу мөсийг хилээр нэвтрүүлж оруулж ирдэг бүлэг этгээдийг Цагдаагийн ерөнхий газрын Хар тамхитай тэмцэх газрын алба хаагчид тусгай ажиллагааны алба хаагчид энэ сарын 2-ны өдөр илрүүллээ. Илрүүлэх ажиллагаанд ЦЕГ-ын Сургалтын нэгдсэн төвийн албаны нохойн сургалтын хэлтсийн албаны нохдыг ашиглаж хар тамхи байгаа эсэхийг шалгаж үнэртүүлж илрүүлсэн. Уг хэрэгт Монгол улсын иргэн 28 настай эрэгтэй М, 33 настай эрэгтэй Ш нарыг шалгаж байна. Дээрх этгээдүүдэд эрүүгийн хуулийн 20.4.7-т зааснаар цагдан хорих, таслан сэргийлэх арга хэмжээг авч цагдан хорьсон. М, Ш нь ICE-ыг Монгол улсын хилээр оруулж ирэн, нийслэлийн иргэдэд зарж борлуулах явцад эд мөрийн баримттайгаар баривчилсан. Харин өөрсдөө хар тамхи хэрэглэдэг байсан эсэхийг шинжлэхийн тулд сорил тавьсан байгаа. Шинжилгээний хариу гарсны дараа мэдээлэл хийх боломжтойг албаныхан дуулгаж байгаа юм.

Дашрамд дуулгахад, он гарснаас хойш энэ сарын 5-ны байдлаар мансууруулах бодис, сэтгэцэд нөлөөтэй бодистой холбоотой 60 үйлдэлтэй, 24 хэрэгт 54 хүнийг холбогдуулан шалгаж байна. Хэрэг бүрдэлт мөрдөн байцаалтын үйл ажиллагаа явуулж байна. Цаашлаад хар тамхины хэрэглээг таслан зогсоох чиглэлээр цагдаагийн байгууллага сургалт семинар явуулж тодорхой  ажлуудыг хийж байгаа гэнэ.