Зам тээврийн ослын үед амь нас, эрүүл мэндээрээ хохирсон хүмүүсийн дийлэнх хувь нь толгой, цээж, хөлийн хэсэгтээ гэмтэл авсан байдаг. Тодруулбал, цагдаагийн байгууллагын мэдээллийн санд бүртгэгдсэн үзүүлэлтээс амь нас, эрүүл мэндээрээ хохирсон хүмүүсийн 46 хувь нь толгойн хэсэгтээ, 12 хувь нь цээжиндээ гэмтэл авсны улмаас амь насаараа хохирсон судалгаа байдаг аж.

Амь насаа алдсан хүний 8.4 хувь нь эмнэлэгийн анхан шатны тусламж авсан байхад, 91.6 хувьд нь эмнэлгийн анхны тусламж үзүүлж чадаагүй байна. Эмнэлгийн анхны тусламж авч чадаагүй тохиолдол өндөр байгаа нь орон нутгийн замд төв, суурин газраас алслагдсан замуудад хүний амь нас хохирсон осол бүртгэгдсэнтэй холбоотой байдаг гэнэ.

Ослын улмаас амь насаа алдсан хүмүүсийн замын хөдөлгөөнд оролцож байсан хэлбэрээр нь үзвэл 143 нь явган зорчигч, 155 нь жолооч, 201 нь тээврийн хэрэгслээр зорчигч, 8 нь дугуйгаар зорчиж байх үедээ осолд өртсөн тоон судалгааг албаныхан танилцуулж байна.