Сургууль болон цэцэрлэгийн хүүхдүүдийн хоол хүнс шим тэжээлгүй байгаа учраас салбар яамнаас эрүүл орчин бий болгох, эрүүл хоол хүнсээр хангах асуудал дээр анхаарлаа хандуулж эхэлсэн байгаа. Хүүхдүүдийн хувьд шим тэжээлгүй, хямдхан үнэтэй тэр дундаа Хятад улсаас импортлогдон оруулж ирдэг хүнсний бүтээгдэхүүн худалдаж авч иддэг байна.

Тухайлбал, Нийслэлийн эрүүл мэндийн хүрээлэнгээс Ерөнхий боловсролын сургуулийн орчин дахь худалдаалж буй хоол хүнсний чанар, аюулгүй байдалд судалгаа хийжээ. Судалгаагаар бага, дунд, ахлах ангийн 1408 сурагчдын дийлэнх хувь нь ундаа (66.0%), пирожки (55.1% ба 7 хоногт 3-4 өдөр), зайрмаг (48.4%), чихэр (39.1%) зэрэг хямд үнэтэй, шимт чанар муутай, тос, сахар болон илчлэг өндөртэй бүтээгдэхүүнийг сургуулийн орчноос худалдан авч иддэг гэнэ.