Дэлхийн олон оронд автомашинаар зорчиход хамгаалах бүсийг зайлшгүй хэрэглэх ёстой гэж үздэг. Олон улсын хэмжээнд хийсэн судалгаа болон туршлагаас үзэхэд автомашинаар зорчигчид хамгаалах бүсийг хэрэглэж хэвших нь ноцтой болон амь насанд аюултай осол гэмтлийг үлэмж хэмжээгээр бууруулдаг үр дүнтэй арга юм.

Хамгаалах бүс хэрэглэсэн тохиолдолд амь насанд аюултай болон ноцтой осол гэмтэл 50 орчим хувь багасгахаас гадна нийгмийн эрүүл мэндийн зардал ч ихээр хэмнэгддэг байна.

Хамгаалах бүс нь биед учрах гадны хүчийг бууруулаад зогсохгүй, осолдсон автомашин доторх хүний биеийг хөдөлгөөнгүй байлгаснаар автомашины эд ангиас бэртэж гэмтэхийг багасгадаг.

Манай улсын хувьд 2013-2016 онд зам тээврийн осол, хэрэгт өртсөн нийт жолооч, зорчигчдын хамгаалах бүс хэрэглэсэн байдлаас үзвэл 68 хувь нь хамгаалах бүс хэрэглээгүй, 16 хувь нь хамгаалах бүс хэрэглэсэн16 хувь нь тогтоогдоогүй байна.

Тиймээс иргэдийн амь нас, эрүүл мэндийг хамгаалах, хамгаалах бүсний хэрэглээг нэмэгдүүлж хэвшүүлэх зорилгоор энэ сарын 31-нийг дуустал “Хамгаалах бүс” арга хэмжээг улсын хэмжээнд зохион байгуулж байна.

Хамгаалах бүс хэрэглэх нь жолооч, зорчигч таны ямагт ухаалаг хэрэг байх болно.

О.Онон