Монгол улсын Ерөнхийлөгчийн 170 дугаар зарлигийн дагуу Дархан-Уул аймгийн Төр захиргаа, хууль хяналт, эрүүл мэнд, боловсрол, эрчим хүч, уул уурхай, төмөр зам, харилцаа холбоо, авто тээвэр, нийтийн аж ахуйн үйлчилгээний салбар болон хувийн хэвшилд олон жил идэвх зүтгэл, үр бүтээлтэй ажиллаж, аймаг, орон нутгийн бүтээн байгуулалт, хөгжил цэцэглэлтэд үнэтэй хувь нэмэр оруулсан 63 иргэнийг Монгол Улсын төрийн дээд одон медалиар /2017.07.09/ шагналаа.

Төрийн дээд одон, медаль гардуулах хүндэтгэлийн арга хэмжээг аймгийн ИТХ-ын дарга Г.Эрдэнэбат нээж үг хэлэн, баяр хүргэсэн бөгөөд Монгол улсын Ерөнхийлөгчийн зарлигийг аймгийн ИТХ-ын Тэргүүлэгчдийн нарийн бичгийн дарга Р.Тунгалаг-Эрдэнэ уншиж сонордуулсан юм.

Салбар салбарын сайчууддаа Монгол Улсын Ерөнхийлөгчийн нэрийн өмнөөс шагналыг нь гардуулж, баяр хүргэхээр аймгийн ИТХ-ын Дарга Г.Эрдэнэбат, Аймгийн Засаг дарга С.Насанбат, аймгийн Засаг даргын орлогч А.Түвшинбат, аймгийн ИТХ-ын Тэргүүлэгчдийн нарийн бичгийн дарга Р.Тунгалаг-Эрдэнэ болон аймгийн ИТХ-ын Тэргүүлэгчид, аймгийн удирдлагууд хүрэлцэн ирсэн юм.

Тулгар төрийн 2226 жил, Монгол улс байгуулагдсаны 811, Үндэсний эрх чөлөө, тусгаар тогтнолоо сэргээн мандуулсны 106 жил, Ардын хувьсгалын 96 жил, Үндэсний их баяр наадам, Дархан-Уул аймгийн 56 жилийн ойн баяраар Дархан Төмөрлөгийн үйлдвэр ХК-ийн инженер Ванчигийн Цэрэннадмидыг Монгол Улсын Аж үйлдвэрийн гавьяат ажилтан цолоор шагналаа.

Мөн Хөдөлмөрийн гавьяаны улаан тугийн одонгоор 8, Алтан гадас одонгоор 31, Цэргийн гавъяаны одонгоор 1, Хөдөлмөрийн хүндэт медалиар 21, Цэргийн хүндэт медалиар 1 хүн тус тус энгэрээ мялаалаа.Монгол улсын Засгийн газрын Осолгүй манлай жолооч цол тэмдгээр 5, Санхүү, банкны Тэргүүний ажилтан цол тэмдгээр 1, Нийтийн аж ахуй тэргүүний ажилтан хүндэт тэмдгээр 1, Төрийн албаны зөвлөлийн “Төрийн албаны Тэргүүний ажилтан” цол тэмдгээр 1, Зам тээвэр хөгжлийн яамны Монгол улсын Онц тээвэрчин цол тэмдгээр 1, Уул уурхай хүнд үйлдвэрийн яамны Газрын тосны Тэргүүний ажилтнаар 2, Эрүүл мэндийн яамны Эрүүлийг хамгаалах тэргүүний ажилтан цол тэмдгээр 2, Уул уурхайн хүнд үйлдвэрийн яамны жуух бичгээр 1, Татварын Ерөнхий газрын Үндэсний татварын хүндэт тэмдгээр 3, Харилцааны холбооны мэдээлэл технологийн газрын мэдээлэл харилцаа холбооны тэргүүний ажилтан цол тэмдгээр 1 иргэн шагнагдлаа. Мөн Дархан-Уул аймгийн Найрамдлын дархан тэмдгээр 6, Тэргүүний ажилтан тэмдгээр 5-н иргэн энгэрээ мялааж баяр дээрээ баяр нэмсэн юм.