Шатахуун импортлогчдын ээлжит “цохилт” ирлээ. Тэд өнгөрсөн оны эцэст үгсэн хуйвалдаж үнээ нэмж, хиймэл хомсдол бий болгож, эцэстээ Засгийн газрыг хүртэл өмнөө сөхрүүлж чадсан билээ. Тодруулбал, дэлхийн зах зээл дээр газрын тосны бүтээгдэхүүний үнэ өссөн, хомсдол бий болсон гэх шалтгаанаар хамгийн эрэлттэй АИ92, А95 төрлийн шатахууны татвараа тэглүүлж чадсан билээ.

Тэгвэл тэд өчигдөр орой бүгдээрээ нэгэн зэрэг шатахууны жижиглэнгийн үнээ нэмж, шатахуун авахаар зорин ирж буй хүмүүс шатахуун олгохдоо хязгаарлалттай олгож байгааг олон эх сурвалж хэлж байгаа юм. Монголын зах зээл дээр шатахуун импортолдог дотоодын хэдхэн компани байдаг ба тэд монополь шахуу болчихсон учраас нууцаар хуралдаж байгаад л үнээ нэмчихдэг жишиг тогтоод удаж байгаа билээ. Өчигдөр ч гэсэн тэд ийнхүү шатахууны үнээ нэмчихлээ.Өчигдөр орой 22:00 цагийн үед шатахуун түгээх станцууд шатахууныхаа үнийг 90-120 төгрөгөөр нэмчихсэн байлаа.

Эрх ямба нь таарахаа болихоор л төр засаг, хэрэглэгчдээ элдвээр шахаанд оруулж байгаа үнээ нэмчихдэг монопольчид энэ удаа төрөөс юу хүсэхийг мэдэхгүй ч тэд ээлжит “цохилт”-оо эхлүүлчихлээ.

Тэдний шалтаг шалтгааныг сонсохоор өнөөдөр Монголын шатахуун хэрэглэгчдийн холбооноос шатахууны үнийн өсөлтийн талаар мэдээлэл хийхээр товложээ.

Ийнхүү төрдөө төмөр нүүр харуулж байгаа шатахуун импортлогчдод төр нь зөрүүлээд төмөр нударгаа үзүүлэх цаг болсон юм биш үү. Энэ удаа тэдэнд битгий л бууж өгч, давраагаасай билээ.