Хувь хүний орлогын албан татвараа шударгаар төлж, улс орныхоо нийгэм эдийн засагт хувь нэмрээ оруулж байгаа хүнийг “Цагийн хүрд”-ийнхэн тахиа жилийн алдартнаар онцоллоо. Т.Мөнх-Эрдэнэ буюу реппэр Gee улс орны эдийн засаг хүндрэлтэй байгаа энэ үед бусаддаа үлгэр дууриалал болж хувь хүний орлогын албан татвараа шударгаар төлөн нийслэлийн шилдэг татвар төлөгч иргэн болсон юм.

Тэрбээр, “Хүмүүс хийх ёстой зүйлээсээ давуулан хийгээд шагнал авч байгаа бол би хийх ёстой зүйлээ хийснийхээ төлөө шагнал авч байгаадаа жаахан ичиж байна. Над шиг үнэн шударгаар татвараа төлдөг олон хүн бий. Тэр бүхний төлөөлөл болгон намайг шагнасанд баярлалаа. Энэ шагнал дээр байгаа миний нэрийг мартаарай. Ер нь амьдралдаа зорилго тавиад, түүнийхээ төлөө тэмүүлэлтэй амьдарч байгаа бүх хүний шагнал шүү. Баярлалаа” гэсэн юм. Мөн “Татвараас над руу яриад шилдэг татвар төлөгч боллоо гэхэд Соёлын тэргүүний ажилтан болохоос ч илүү баярласан” хэмээн сэтгэгдлээ хуваалцсан юм.