Өнөөдөр Дархан-Уул аймгийн Засаг дарга С.Насанбат тэргүүтэй ажлын хэсэг төмөр замын авто вокзалын гадна худалдаа үйлчилгээ эрхэлдэг иргэдтэй уулзаж хоёр жил гаруй яригдаж байгаа худалдааны цэгийг барих газрыг сонгосон юм.

Хүн амын хөгжил, нийгмийн хамгааллын яам, Дархан-Уул аймаг хамтран орон нутгийн төсвийн хөрөнгө оруулалтаар Дархан сумын дөрөвдүгээр багийн нутаг дэвсгэрт буюу төмөр замын авто вокзалын орчимд 32 метр урттай, зургаан метр өргөнтэй худалдааны цэгийг энэ ондоо багтаан барихаар болжээ.

Энэхүү худалдааны цэг ашиглалтад орсноор 50 орчим иргэн тогтмол ажлын байртай болж хотын өнгө үзэмж, хүнсний тухай хууль, найдвартай хүнс, баталгаат жингээр үйлчлүүлэх боломж иргэд бидэнд бүрдэх ач холбогдолтой юм. Мөн төмөр замын авто вокзалын орчимд гардаг гэмт хэргийн гаралт тодорхой хэмжээгээр бууруулах давуу талтай ажээ.